Berdaq atındaǵı Qaraqalpaq mámleketlik universitetinde «Jaslar arasında náshebentlik zatlardıń tarqalıwınıń aldın alıw hám olarǵa qarsı gúresiw» atamasında ushırasıw bolıp ótti. Onda Ózbekstan Respublikası Ishki isler ministrligi operativ qıdırıw departamenti, jınayat qıdırıw xızmeti baslıǵı orınbasarı A.Matlyubov, Ózbekstan Respublikası Ishki isler ministrliginiń jınayat qıdırıw basqarması juwapker xızmetkerleri A.Raximov, I.Jahongirov, Qaraqalpaqstan Respublikası Ishki isler ministrligi operativ qıdırıw departamenti, jınayat qıdırıw xızmeti baslıǵı N.Davronov, Qaraqalpaqstan Respublikası Ishki isler ministrliginiń jınayat qıdırıw basqarması baslıǵı orınbasarı N.Abdullaev, Respublika qánigelestirilgen, narkologiya ilimiy ámeliy medicina orayı Qaraqalpaqstan aymaqlıq filialı shıpakeri N.Dawletmuratovalar miymanda boldı. Dáslep ushırasıwda Qaraqalpaq mámleketlik universiteti Jaslar máseleleri hám ruwxıy-aǵartıwshılıq isleri boyınsha prorektor S.Alawatdinov ashtı hám alıp bardı. Ol óz shıǵıp sóylewinde respublikamız aymaǵında jinayatshılıqtıń, náshebentliktiń aldın alıw maqsetinde alıp barılıp atırǵan is-ilajları, sonday-aq hár jılı fevral ayında ótkeriletuǵın profilaktika ilajları boyınsha keń túrde maǵlıwmatlar berdi.
Bunnan soń, Ishki isler ministrliginiń jınayat qıdırıw basqarması juwapker xızmetkeri A.Raximov, Ózbekstan Respublikası Ishki isler ministrliginiń jınayat qıdırıw basqarması juwapker xızmetkeri I.Jahongirov, Qaraqalpaqstan Respublikası Ishki isler ministrliginiń jınayat qıdırıw basqarması baslıǵı orınbasarı N.Abdullaev hám de Respublika qánigelestirilgen, narkologiya ilimiy ámeliy medicina orayı Qaraqalpaqstan aymaqlıq filialı shıpakeri N.Dawletmuratovalar sózge shıǵıp, jaslar arasında náshebentliktiń ham jaslar arasındaǵı narkotik zatlardıń tarqalıwdıń aldın alıw hám oǵan qarsı gúresiw, náshebentliktiń awır aqibetleri haqqında júrgizilip atırǵan úgit-násiyat jumısları hám de AIJS kesselliginiń awır aqibetleri haqqında aytıp ótti.
Sonday-aq ayrım jaslarımızdıń narkotik zatlar menen baylanıslı jınyatlardı islewi hám náshebentlik jolına kirip baratırǵanlıǵı haqqında toqtalıp, joqarıda keltirip ótilgen unamsız illetlerge qarsı bárshe jaslar menen birgelikte gúresiw kerekligi aytıp ótildi.
QMU baspasóz xızmeti
