Prezidentimiz basshılıǵında búgingi kúnde elimizde hayal-qızlarǵa ǵamqorlıq kórsetiw, olardı hár tárepleme qollap-quwatlaw, jámiyetlik-siyasiy, sociallıq-ekonomikalıq turmıstaǵı belsendiligin arttırıwǵa ayrıqsha itibar qaratılmaqta. Mamleketimizde gender teńlikti támiyinlew, hayal-qızlardı jámiyetimizdiń barlıq tarawlarında óz qábiletin, potencialın kórsetiwine keńnen jol ashıldı.
Xabarıńız bar, Birlesken Milletler Shólkemi Bas Assambleyasınıń 2015-jıl 22-dekabr kúngi 70-sessiyasında 11-fevral «Ilim hám bilimlendiriw tarawındaǵı hayal-qızlar kúni» sıpatında rásmiy belgilenip, 2016 jıldan baslap dúnyanıń kóplegen mámleketlerinde 11-fevral keń túrde nıshanlanıp kelinbekte.
Usı tiykarda búgin Berdaq atındaǵı Qaraqalpaq mámleketlik universiteti hayal-qızlar keńesi tárepinen 11-fevral «Ilim hám bilimlendiriw tarawındaǵı hayal-qızlar kúni» múnásibeti menen “Ilim hám innovaciyalardı rawajlandırıwda hayal-qızlardıń ornı” atamasında ilimiy konferenciya bolıp ótti.
Onda Qaraqalpaqstan Respublikası Ministrler Keńesi Baslıǵınıń orınbasarı, Shańaraq hám hayal-qızlar komiteti baslıǵı M.Axmedova, Qaraqalpaqstan Respublikası Joqarǵı Keńesiniń juwaplı xızmetkeri B.Ayımbetova, universitet rektor másláhátshisi I.Seytnazarovalar qatnastı. Sonday-aq, universitetimizde ilim-bilimlendiriw tarawında izertlew jumısların alıp barǵan, kóplegen shákirtlerdiń ádiwli ustazı dárejesine jetken, elede ilim jolında ayanbay miynet etip kiyatırǵan bir qatar ilimpaz hayal-qızlarımız búgingi bayram ilajımızdıń ádiwli miymanı boldı. Konferenciyanı universitet rektorı akademik A.Reymov ashıp berdi hám bayram menen qutlıqladı. Ol óz shıǵıp sóylewinde Mamleketimizde gender teńlikti támiyinlew, hayal-qızlardı jámiyetimizdiń barlıq tarawlarında óz qábiletin, potencialın kórsetiwine keńnen jol ashılǵanlıǵın, bul óz gezeginde respublikamızda ámelge asırılıp atırǵanı reformalardıń qalaberse analarımızǵa, apa hám qarındaslarımızǵa, dilbar qızlarımızǵa degen ayrıqsha itibar hám ǵamqorlıqtıń kórinisi ekenligin aytıp, bársheni bayram menen qızǵın qutlıqladı. Bunnan soń, sózge shıqqanlar, “Ilim hám bilimlendiriw tarawındaǵı hayal-qızlar kúni” nıshanlanıwı ilimpaz hayal-qızlar hám ilimiy dóretiwshilik jumısların alıp barıp atırǵan hayal-qızlarǵa itibar kórsetiw ushın imkaniyat jaratılǵanlıǵı, bunday jaratılǵan imkanyatlardan aqılǵa uǵras paydalnıp, búgingi kúnde hayal-qızlarımız ilim, bilimlendiriw, medicina, mádeniyat, sport, sanaat, awıl xojalıǵı sıyaqlı jámiyetimizdiń eń áxmiyetli tarawlarında tabıslı jumıs alıp barıp atırǵanlıǵın ayrıqsha maqtanısh penen atap ótti. Konfernciyanıń kórkem bóliminde universitetimiz talantlı student-jasları tárepinen koncert baǵdarlaması shólkemlestirilip, jıynalǵanlar názerine usınıldı.
QMU baspasóz xızmeti
