Xabarıńız bar fevral ayı «Jaslar arasında náshebentlik hám psixotrop zatlar tarqalıwınıń aldın alıw» aylıǵı dep belgilengen. Usı múnásibet penen Dene mádeniyatı fakulteti student-jasları arasında náshebentlik zatlar menen baylanıslı jaǵdaylardıń aldın alıw, olar arasında salamat turmıs tárizin qáliplestiriw, oǵan qarsı gúresiw hám de profilaktikalıq úgit-násiyatlaw jumısların alıp barıw maqsetinde usı jıl 9-fevral kúni taraw qánigeleri menen birgelikte «Jaslar arasında náshebentlik hám psixotrop zatlar tarqalıwınıń aldın alıw» atamasında úgit-násiyatlaw ilajı ótkerildi.
Ilajǵa jaslar menen islesiw boyınsha dekan orınbasarı R.Óteniyazov, Qaraqalpaqstan Respublikası qánigelestirilgen narkologiya ilimiy-ámeliy orayı shıpakerleri P.Seytekov, Q.Atamuratovlar, tyutorlar hám student-jaslar qatnastı. Ilajda taraw qánigeleri tárepinen jaslar arasında náshebentlik zatlarınıń tarqalıwına qarsı gúresiw, jaslardıń náshebentlikke berilmewi, narkotik zatlarınıń zıyanlı, ayanıshlı hám awır aqıbetleri, bul illet aqıbetinde jınayatshılıq hám de huqıqbuzarlıq jaǵdayları kelip shıǵatuǵınlıǵı, bunday illetke qarsı bárshe jaslar birgelikte gúresiwleri lazım ekenligi, sonday-aq, bul jaman illettiń aldın alıw maqsetinde Respublika jasları salamatlıǵın kúsheytiw, bárkamal insan etip tárbiyalawǵa qaratılǵan ilajlar hám hár túrli sport túrlerinen jarıslar ótkeriliwin, jaslardıń sport sekciyalarına bekitiliwin, olardıń bos waqıtların mazmunlı shólkemlestiriw haqqında ayrıqsha atap ótildi.
Ótkerilgen ilajdıń tiykarǵı maqseti jaslar arasında narkotik zatlardıń tarqalıwına qarsı gúresiw hám aldın alıw, bul jaman illet boyınsha keńnen úgit-násiyat jumısların alıp barıw, sonıń menen birge jaslarımızdı zárúr maǵlıwmatlar menen tanıstırıp barıw dáwir talabı bolıp tabıladı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
