Húrmetli Prezidentimizdiń baslaması menen Aral teńiziniń suwı qurıǵan ultanı hám Aralboyı aymaǵınan kóterilip atırǵan qum, duz hám shańlardıń unamsız tásirlerin kemeytiw, bul aymaqlarda shól ósimliklerinen «jasıl qaplamalar» payda etiw boyınsha keń kólemli jumıslar alıp barılmaqta.

Usınday iygilikli baslamaǵa múnásip úles qosıw maqsetinde usı jıldıń 13-fevral kúni Berdaq atındaǵı Qaraqalpaq mámleketlik universiteti jámááti hám bir qatar belsendi student-jasları “Mehir Araldı qutqaradı!” uranı astında Araldıń qurıǵan ultanındaǵı «nolinshi noqat» dep atalatuǵın orında boldı.

Bul jerde, universitetiniń bir topar student-jasları professor-oqıtıwshıları jaqsı niyetler menen seksewil, jıńǵıl hám basqada shólge shıdamlı ósimlik nálleri hám tuqımların belgilengen orınlarǵa egip, óz úleslerin qostı.  Ilajda Berdaq atındaǵı Qaraqalpaq mámleketlik universiteti rektorı, akademik A.Reymov qatnasıp, Aral teńizindegi ekologiyalıq jaǵdaydı jaqsılaw, hawaǵa kóterilip atırǵan duzlardıń tarqalıwın kemeytiw hám bunda shólge shıdamlı ósimliklerdi kóbirek egiw, egilgen seksewil nálleriniń qorshaǵan ortalıǵımız ushın áhmiyeti haqqında aytıp, student-jaslarǵa bunday iygilikli jumıslarǵa óz úlesin qosıp atırǵanı ushın minnetdarshılıq bildirdi.

Haqıyqatında da bunday ilajlardı ótkeriwden tiykarǵı maqset Ana tábiyattı asıraw, tábiyiy resurslardan aqılǵa uǵras paydalanıw, sonday-aq, jer, suw, toǵay, atmosfera hawasın, ósimlikler hám haywanatlar dúnyasın qorǵaw, olardı zıyanlanıwdan, joq bolıp ketiwiniń aldın alıw boyınsha, student-jaslarǵa túsindiriw jánede tábiyatımızdı asırıwǵa óz úlesimizdi qosıw bolıp tabıladı – deydi universitettiń Jaslar máseleleri hám ruwxıy-aǵartıwshılıq isleri boyınsha prorektor S.Alawatdinov.

QMU Baspasóz xızmeti.