Xabarıńız bar fevral ayı «Jaslar arasında náshebentlik hám psixotrop zatlar tarqalıwınıń aldın alıw» aylıǵı dep belgilengen. Usı múnásibet penen usı jıldıń 19-fevral kúni Studentler turar jayında jasawshı Dene mádeniyatı fakulteti studentleri arasında sporttıń shaxmat hám shashka túrleri boyınsha jarıs ótkerildi. Jarısqa jámi 25 ten aslam student-jaslar qatnastı. Jarıs qızǵın bellesiwlerge bay bolıp, jaslardıń oylaw qábileti, olardıń bos waqıtların qay dárejede ótkeriwi, aqıldı shınıqtırıw jolları, ilimiy intellektuallıq potencialı sınaldı.
Jarıs dene mádeniyatı teoriyası hám metodikası assistenti, tóreshi A.Qazaqbaev hám tyutorlar tárepinen ádil bahalanıp, jarıs jeńimpazları anıqlandı hám de shólkemlestiriwshiler tárepinen tayarlanǵan diplomlar hám estelik sawǵaları menen sıylıqlandı. Ótkerilgen jarıstıń tiykarǵı maqseti Prezidentimiz tárepinen ilgeri súrilgen jaslar mánawiyatın joqarılatıw hám olardıń bos waqıtların mazmunlı ótkeriw boyınsha áhmiyetli bes baslama hám de sporttı rawajlandırıw boyınsha qabıl etilip atırǵan húkimet qaralarınıń orınlanıwın támiyinlew bolıp tabıladı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
