Xabarıńız bar, házirgi waqıtta joqarı oqıw orınlarında 1-mart hám 15-mart aralıǵında «Salamat turmıs tárizi» atamasında úgit-násiyatlaw ilajları ótkerilmekte. Usı múnásibet penen 6-mart kúni Dene mádeniyatı fakulteti student-jasları arasında «Salamat turmıs tárizi» atamasında profilaktikalıq ilaj shólkemlestirildi. Ilajǵa Dene mádeniyatı fakulteti dekanı N.Kaypov, QR IIM xızmetkerleri, mayor R.Abdijamilov, mayor J.Edenbaev, Qaraqalpaqstan Respublikası AIJSke qarsı gúresiw orayı shıpakeri G.Dawletova, QMU profilaktika inspektorı, mayor I.Erejepov, tyutorlar hám de student-jaslar qatnastı.
Ilajda bayanatshılar AIJS keselliginiń payda bolıw tariyxı, onıń juǵıw jolları, rawajlanıw dáwirleri, zıyanlı, ayanıshlı hám awır aqıbetleri, dúnya boylap hám respublikamızda AIJS keselligi menen awırǵan puqaralar esapta turatuǵınlıǵı, bul illetten qorǵanıw jolları, jeke gigiena, bul kesellike qarsı bárshe jaslar birgelikte gúresiwleri lazım ekenligi, sonday-aq, urlıq islew, qumar oynaw, óz-ara jánjellesiw, zorlıq hám basım ótkeriw, jol háreketi qáwipsizligi qaǵıydaları, spirtli ishimlikler ishiw, kewil ashar orınlarǵa barıw, korrupciya, aldawshılıq, tonawshılıq, diniy ekstremizm, jınısıy qatnas hám qospashılıq, kiberjınayat, pirotexnika ónimlerin paydalanıw yamasa satıw, hár túrli náshebentlik, psixotrop zatlardı paydalanıw, satıw yamasa satıp alıw sıyaqlı jınayatlardıń awır aqıbetleri haqqındaǵı túsiniklerdi anıq faktler menen keltirip ótti.
Ótkerilgen ilajdıń tiykarǵı maqseti jaslar arasında AIJS keselligi, huqıqbuzarlıq hám jınayatshılıqtıń erte aldın alıw boyınsha keńnen úgit-násiyatlaw jumısların alıp barıw, sonıń menen birge jaslardı zárúr maǵlıwmatlar menen tanıstırıp barıw bolıp tabıladı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
