Berdaq atındaǵı Qaraqalpaq mámleketlik universiteti Shet tilleri fakulteti «Fakultetler aralıq shet tilleri» kafedrası docenti J.Taspanova, Fizika fakulteti dekan másláhátshisi G.Nurımbetova menen birgelikte “Erte turmıs qurıwdıń aldın alıw hám jaqın aǵayinler arasında nekeniń aldın alıw» temasında taraw qánigeleri menen sáwbetlesiw keshesi ótkerildi. Keshege Nókis qalası «Ana hám bala skriningi» orayı shıpakerleri G.Torambetova, D.Izbaskanova, «Fakultetler aralıq shet tilleri» kafedrası professor-oqıtıwshıları, fizika fakulteti tyutorları hám fakultet student qızları qatnastı.
Dáslep «Ana hám bala skriningi» orayı shıpakeri D.Izbaskanova sózge shıǵıp, erte turmıs qurıwdıń aldın alıw hám qızlar arasındaǵı mashqalalarǵa toqtalıp ótti. Hár bir qız bala keleshekte bolajaq ana. Sonıń ushında tómendegilerge jol qoymaw kerekligi, yaǵnıy zob keselligi, kemqanlıq kesellikleri hám búyrek kesellikleri haqqında anıq maǵlıwmatlar berip, óz waqtında poliklinikada medicinalıq kórikten ótip turıw kerekligin atap ótti. Sonıń menen birge, qız balanıń neshe jasta turmısqa shıǵıwǵa bolatuǵınlıǵı, tuwıwshılıqtıń arası neshe jıl bolıwı kerekligin student qızlarǵa anıq faktler menen keltirip ótti. Sonday-aq, genetik keselliklerdi boldırmaw hám olardıń aldın alıw boyınsha másláhátler berip ótti. Sóziniń sońında student qızlar ózleriniń den-sawlıqlarına júdá itibarlı bolıw kerekligin atap ótti.
Bunnan soń, «Ana hám bala skriningi» orayı shıpakeri G.Torambetova. Salamat anadan salamat perzent dúnyaǵa keletuǵının, qızlardı jaslayınan turmısqa tayarlawda kóbirek olardın den-sawlıqlarına itibar beriw kerekligin aytıp ótti. Olardıń oqıw dáwirinde salamatlıǵı boyınsha kelip shıǵatuǵın mashqalalarǵa toqtalıp, kóbirek tuwrı awqatlanıw boyınsha, qosımsha vitaminlerdi tuwrı qabıllaw kerekligi haqqında tolıq maǵlıwmatlar berip ótti. Jaqın aǵayinler ortasında nekeniń aldın alıw boyınsha keń túrde túsinikler berilip, bunda keleshektegi perzentleriniń salamat bolıwı tek ǵana óziniń shańaraǵı ushın emes, bálkim mámleket ushında júdá áhmiyetli ekenligin aytıp ótti. Student qızlar ózleriniń qızıqtırǵan sorawlarına taraw qánigelerinen tiyisli juwaplar aldı.
