Usı jıldıń 16-mart kúni Qaraqalpaq mámleketlik universitetiniń Hayal-qızlar másláhát keńesi tárepinen shólkemlestirilgen hár jılı ótkeriliwi dástúrge aylanǵan «Jańa Ózbekstannıń jańa dáwir qızları» uranı astında «Dáwir qızları» tańlawı bolıp ótti.

Universitet boyınsha derlik barlıq fakultetlerden 300 aslam student-qızlardıń bilimin, ádep-ikramlıǵın, ziyrekligin hám shaqqanlıǵın, saxnada ózin tutıw mádeniyatın, qábiletin sınnan ótkerdi.

Tańlaw úsh shártten ibarat bolıp bunda barlıq komandalar ózleriniń tálim baǵdarlarınan kelip shıqqan halda fakultetiniń hayal-qızlar turmısındaǵı jańalıqlar, ilimpaz ustaz hám student-qızları haqqında tamashagóylerge maqtanısh etip qosıq qatarları arqalı keltirip, muzıkalı shıǵıwları hám házil-dálkeklerin usındı.

Itibarlısı hár-bir komandanıń shıǵıwlarında ózine tánlik, elimizde alıp barılıp atırǵan reformalar, milletleraralıq tatıwlıq, tınıshlıq hám shúkirshilik sezimleri sáwlelengenligi bárshege ózgeshe keypiyat baǵıshladı.

Ekinshi shártte bolsa student-qızlarımız mádeniyatlı kiyiniw ádeplilik belgisi ekenligin saxnada kórsetip berip, milliylikke zamanagóylik úylesimli etip tiktirilgen libaslardi tańlaw, oqıw ornı hám universitettiń hár qanday ruwxıy-aǵartıwshılıq ilajlarında kiyiw ushın arnawlı kiyimler jámlenbesin kórsetip ótti.

Juwmaqlawshı úshinshi shártte qızlardıń siyasiy-huqıqıy sawatlılıǵı sınaqtan ótkerildi.

Tańlaw juwmaǵında kúnniń birinshi yarımında bellesken komandalar arasınan ózgeshe shıǵıwları menen bársheni lal qaldırǵan Qaraqalpaq filologiyası hám jurnalistika fakulteti 1-orın boldı. 2-orındı Ximiya-texnologiya fakulteti, 3-orındı Geografiya hám tábiyiy resurslar fakulteti iyeledi.

Kúnniń ekinshi yarımında ótken jarısta 1-orındı Ózbek filologiyası, 2-orındı Dene mádeniyatı fakulteti iyelegen bolsa sıylı 3-orın Yuridika fakultetine nesip etti.

Tańlaw jeńimpazları rektorat tárepinen tayarlanǵan diplom hám orınlar kesiminde (1-orın 3.000.000, 2-orın 2.500.000, 3-orın 2.000.000)sıylıqlandı.