Usı jıldıń 19-mart sánesinde Qaraqalpaq mámleketlik universiteti Xalıqaralıq birge islesiw bólimi tárepinen Ullı Britaniyanıń De Montfort universiteti hám Qaraqalpaq mámleketlik universitetiniń ekonomika hám shet tilleri fakulteti arasında onlayn ushırasıw shólkemlestirildi. Dáslep De Montfort universiteti wákili Dunkan Hepworth óziniń universiteti haqqında maǵlıwmatlar berip ótti. Óz ornında QMU shet tilleri fakulteti dekanı Dj.Kurbanbaev hám de ekonomika fakulteti kafedra baslıǵı Z.Tajekeev shet tilleri hám ekonomika fakultetleri haqqında qısqasha aytıp ótti.
Ushırasıw barısında, ekonomika hám shet tilleri fakultetleriniń wákilleri studentler almasıw, professor-oqıtıwshılardı tájiriybe arttırıw ushın ilimiy stajirovkaǵa jiberiw hám akademik mobillik sıyaqlı bir qatar ózleriniń usınısların aytıp ótti. Óz gezeginde, D.Hepworth bildirilgen usınıslar óz-ara birge islesiwge tiykar bolatuǵının atap ótti hám qollap quwatladı. Sonıń menen birge, De Montfort universiteti wákili óziniń usı jıldıń may ayındaǵı Ózbekstanǵa saparı dawamında Qaraqalpaq mámleketlik universitetine keliwin hám kóp tarmaqlı óz-ara baylanıslardı jolǵa qoyıw boyınsha qosımsha sóylesiwlerdi alıp barıwǵa tayar ekenin bildirdi.
Maǵlıwmat ushın: Usı jıldıń 4-5-mart kúnleri bolıp ótken Ózbekstan-Ullı Britaniya Bilimlendiriw Forumında A.Reymov De Montfort universiteti wákili menen sóylesiw alıp bardı.
