Bárshemizge belgili bolǵanınday, báhár máwsiminiń kirip keliwi Grigoriy kalendarında 1-mart sánesinen baslanadı. Kalendar boyınsha báhár mart, aprel hám may ayları bolıp esaplansa da, tiykarınan fevral ayınan, ortasha sutkalıq temperatura +5℃ tan asqanda baslanadı. Nókis qalalıq MSHMBB ne qaraslı 22-sanlı ayrım pánler tereń úyreniletuǵın klası bar ulıwma orta bilim beriw mektebinde ótken pedagogikalıq ámelyatınıń juwmaǵı sıpatında Berdaq atındaǵı Qaraqalpaq mámleketlik universitetiniń Geografiya hám tábiyiy resurslar fakulteti geografiya tálim baǵdarınıń 4–kurs toparı studentleri mektep jámááti menen birgelikte báhár máwsiminiń kirip keliwine baylanıstırıp «Úlkemizde báhár» atlı geografiyalıq keshe shólkemlestirdi.
Keshege universitetimizdiń Tábiyiy geografiya hám gidrometrologiya kafedra baslıǵı K.Allanazarov, Oqıw isleri boyınsha dekan orınbasarı A.Joldasov, Ekonomikalıq hám sociyallıq geografiya kafedra baslıǵı G.Bekpolatova, úlken oqıtıwshı M.Tursinov, assistent oqıtıwshılardan Q.Daljanov, K.Utarbaeva, ámeliyat boyınsha metodislerden prof. G.Xodjaeva, úlken oqıtıwshı G.Nauruzbaeva ass.Yu.Urazımbetovalar, sonday-aq usı mekteptiń oqıw isleri boyınsha direktor orınbasarı G.Aymurzaeva, ruwxıylıq aǵartıwshılıq isleri boyınsha direktor orınbasarı Sh.Xafizova, Geografiya-Ekonomika metod birlespe baslıǵı Q.Ataniyazova, geografiya páni oqıtıwshıları G.Xojaniyazova, Z. Davletmuratova, Geografiya tálim baǵdarınıń 4-kurs toparı student ámelyatshıları hám mektep oqıwshıları qatnastı.
Kesheni oqıw isleri boyınsha mektep direktor orınbasarı G.Aymurzaeva, ashıp berip «Úlemizde báhár» atlı geografiyalıq keshe boyınsha Geografiya pánindegi báhár máwsimıniń úlkemizge kirip keliwi hám 8-mart hayal-qızlar bayramı menen qutlıqlap ótti hám kesheni shólkemlestiriwshilerge óz alǵısların ayttı. Sonday-aq, Tábiyiy geografiya hám gidrometrologiya kafedra baslıǵı K.Allanazarov shıǵıp sóylep, óz sózinde búgingi kúnde bunday keshelerdiń áhmiyeti júdá úlken ekenligin aytıp ótti.
Geografiyalıq keshe geografiya tálim baǵdarı 4-kurs studenti Sarsenbaev Nursultannıń «Úlkemizde báhár» atlı bayanatı menen baslandı.
Keshe dawamında student jaslar tárepinen tayarlanǵan bir neshe geografiyalıq oyınlar hám kewil kóteriwshi koncert baǵdarlamaları tamashagóylerge inam etildi. Atap aytqanda, ámeliyachı Duwletmuratova Raisa 7A,B-klaslar arasında «Sıyqırlı tań», Seytnazarov Adilbek tárepinen 7A,B-klaslar arasında «Siz kartanı bilesizbe?», Adilbaev Aybek tárepinen tayarlanǵan «Bilimler sayabanı» atlı oyını, Askarova Gúlzada tárepinen tayarlanǵan oqıwshılar arasında «Súwretler kórgizbesi» atlı tańlaw jarısı hám tamashagóyler menen ótkerilgen geografiyalıq oyınlar keshe qatnasıwshılarında úlken qızıǵıwshılıq oyattı. Bazarbaev Fayzulla tárepinen tayarlangan «Geografiyalıq loto» oyınında júdá qızıǵarlı sorawlar berilip zalda otırǵan tamashagóyler menen ótkerildi.
Ámeliyatshılar Kayupov Maxmud, Zaribaev Sulaymanlar tárepinen «Siz bilesizbe?» degen temada sociologiyalıq sorawnama ótkerilip tayarlanǵan video roligi tamashagóylerdiń alǵısına sázawar boldı.
Sonday-aq, keshede koncert baǵdarlamaları, quwnaqlar hám ziyrekler toparı házilleri, 7B klass oqıwshı qızlarınıń atqarıwında ayaq oyınlar, ámeliyatshı Qudaybergenov Nazbergen tárepinen «Báhár keldi» atlı janlı hawazdaǵı qosıq baǵdarlamaları da orın aldı.
Barlıq ótkerilgen tańlawlar boyınsha jeńimpazlar anıqlandı hám olar ámeliyachı studentler tárepinen bahalı sawǵalar hám “Húrmet jarlıq” ları menen sıylıqlandı. Al, ámeliyatta aktiv qatnasqan ámeliyatshılarǵa mektep direktorı tárepinen hár qıylı nominaciyalar berildi. Keshe onda qatnasqan barlıq qatnasıwshılarda úlken tásir qaldırdı hám oqıwshı jaslarda usı geografiyalıq keshe arqalı unamlı tásirler hám ájayıp kónlikpeler payda boldı degen úmittemiz.
Ekonomikalıq hám sociallıq geografiya
kafedrası professorı w.a.G.A.Xodjaeva,
úlken oqıtıwshı G.T.Nauruzbaeva,
4A-kurs geografiya tálim baǵdarı studenti N.D.Sarsenbaev
