Xabarıńız bar, Húrmetli Prezidentimiz baslaması menen 2021-jıl noyabr ayınan baslap, hár jılı terek egiw, yaǵnıy «Jasıl mákan» ulıwma milliy joybarı kóterińki ruwxta ótkerilip kelinbekte.

Jaqında ǵana 29-mart kúni Prezident Shavkat Mirziyoev basshılıǵında «Jasıl mákan» joybarı sheńberinde báhárgi egis máwsimin shólkemlestiriw hám shıǵındılardı basqarıwdı jetilistiriw boyınsha ótkerilgen videoselektor májilisinde báhárgi máwsimde «Jasıl mákan» joybarı sheńberinde 125 million túp nál egiw belgilengenligin aytıp ótti.

Usı tapsırmalardıń orınlanıwın támiyinlew maqsetinde búgin 3-aprel kúni Berdaq atındaǵı Qaraqalpaq mámleketlik universiteti rektorı A.Reymov basshılıǵında universitet jámááti hám barlıq fakultet professor-oqıtıwshıları tárepinen universitet átirapındaǵı 1 gektar maydanǵa shamalas orınǵa ustazlar baǵı jaratıldı.

Bul jerde rektor A.Reymov professor-oqıtıwshılarǵa óz baslaması menen bir túp terek nállerin alıp kelip, onı egip, ustazlar baǵına úlesin qosıp atırǵanı ushın minnetdarshılıq bildirdi. Endi bul otırǵızılǵan nállerdi tek ǵana egip qoymastan ósip rawajlanaman degenshe onıń kútimi menen shuǵullanıw kerekligin aytıp ótti.

Sonday-aq, aldaǵı waqıtları usı orında tájiriybe maydanı sıpatında topıraqqa tez beyimlesetuǵın terek nállerin egiw kerekligi boyınsha qánigelerge tapsırmalar berdi.

Ótkerilgen «Jasıl mákan» ulıwma milliy joybarı sheńberinde universittetiń barlıq fakultetlerinen 1000ǵa jaqın professor-oqıtıwshılar hám kewilli jaslar qatnasıp, ustazlar baǵına 1000 aslam dekorativ hám miywe terek nállerin otırǵızdı. 

QMU baspasóz xızmeti