Aldın xabar bergenimizdey, Koreyanıń YOUNG IN SN CO, Ltd hám KBSI (Korean Basic Science Institute) wákillerinen ibárat delegaciya aǵzaları Qaraqalpaq mámleketlik universitetinde boldı. Dáslep delegaciya aǵzaları menen universitet rektorı A.Reymov ushırasıp, tárepler ortasında birge joybarlar islewdi elede rawajlandırıw, ilim-izertlew hám laboratoriya imkaniyatların keńeytiw máseleleri boyınsha sóylesiwler alıp barıldı.
Bunnan soń, ushırasıw universitet májilisler zalında dawam etti. Bul jerde universitet ilimiy isler hám innovaciyalar boyınsha prorektor I.Turdımambetov kelgen miymanlar menen professor-oqıtıwshılar hám student-jaslardı tanıstırıp, tárepler ortasında aldın bolıp ótken ushırasıwlar hám ámelge asırılıp atırǵan joybarlar haqqında aytıp ótti.
Ushırasıw dawamında Koreyadan kelgen miymanlar YOUNG IN SN CO Ltd., kompaniyası hám KBSI (Korean Basic Science Institute) haqqında video prezentaciya kórinisinde maǵlıwmatlar berip ótti.
Ushırasıwdıń soraw-juwap bóliminde universitettiń professor-oqıtıwshıları, doktorantlar hám student-jaslar ekologiya, topıraqtanıw, topıraq hám suwdıń duzın azaytıw, sonday-aq, Araldıń qurıw aqıbetin jumsartıw boyınsha laboratoriya hám ilimiy-izertlew imkaniyatları haqqında ózleriniń qızıqtırǵan usınıs hám sorawların berip, tolıq juwaplar aldı. Ushırasıwdan soń, miymanlar universitettiń jańadan 1800 orınǵa mólsherlengen oqıw laboratoroyalarına arnalǵan imarattıń qurlıs jumısların kózden ótkerdi hám bul jerde keleshekte ilim menen shuǵıllanatuǵın jas alımlar ushın jaratılatuǵın imkaniyatlarǵa joqarı baha berdi.
