Bárshemizge belgili Ózbekstan hám Malayziya mámleketleri arasında barlıq tarawlarda birge islesiw jaqsı jolǵa qoyılǵan. Bunıń ayqın mısalı retinde Berdaq atındaǵı Qaraqalpaq mámleketlik universiteti Malayziyanıń Linkoln universiteti kolledji menen qospa tálim dástúri tiykarında birge islesiw boyınsha shártnama imzalanıp, búgingi kúnde keń kólemli jumıslar ámelge asırılmaqta. Studentlerimiz universitette 2 jıl dawamında tálim alıp, házirgi waqıtta Linkoln universitet kolledjinde oqıwın dawam etiriw ushın keldi.

Aldın xabar bergenimizdey, Qaraqalpaq mámleketlik universiteti Shet tiller fakulteti dekanı Dj.Kurbanbaev hám xalıqaralıq birge islesiw bóliminen Sh.Shaniyazovlar ámeliy sapar menen usı universitette bolıp turıptı.

Sapar dawamında Shet tiller fakulteti dekanı Dj.Kurbanbaev Malayziyanıń Linkoln universitet kolledjinde studentlerge shet tillerdi oqıtıw metodikası, kommunikativ kompetensiyaların rawjlandırıw usılları, studentlerdiń shet tilleri boyınsha bilimin bahalaw sabaqlarınan lekciya oqıdı. Lekciyalar dawamında studentler belsendi qatnasıp, ózleriniń tarawı boyınsha bilim hám kónlikpelerge iye boldı.

Sapardan gózlengen maqset Linkoln universitet kolledjine universitetimizden barıp oqıwın dawm etip atırǵan student-jaslardıń sabaq processleri menen jaqınnan tanısıw, olardıń jasaw shárayatı, bilim alıw, kásiplik tayarlıǵı dárejelerin úyreniwden ibarat.