Berdaq atındaǵı Qaraqalpaq mámleketlik universitetiniń Qaraqalpaq filologiyası hám jurnalistika fakulteti oqıtıwshıları Z.Qojıqbaeva hám S.Esemuratovalar tárepinen «Jańalıqlar hám analitikalıq jurnalistikası» páni sheńberinde shólkemlestirilgen seminar ótkerildi. Seminarda Qaraqalpaqstan radiosı jurnalisti M.Tilepova miymanda boldı hám 4-kurs jurnalistika (xizmet túrleri) studentleri tárepinen radiojurnalistika tarawı boyınsha tayarlanǵan prezentaciyalar qoyıp berildi.

«Respublika aymaǵında radiokanallar» – Nurjamal Bazarbaeva, «Radiojurnalistikada janrlar menen islesiw» – Bibisanem Joldasbaeva, «Radiojurnalistikada derekler menen islesiw» – Gúldana Erejepova hám «Qaraqalpaqstan radiosında tekst strukturası, stillik ózgeshelikler» – Nesibeli Baltaniyazovalar búgingi kúnde radiojurnalistika tarawında qanday jańalıq hám ózgerisler bolǵanı, Qaraqalpaqstan radiosında «Xabar» esittiriwiniń uzatılıwı, jetiskenlikler hám kemshilikler atap ótildi.

«Toparlasımız benen 3 ay dawamında 107.8 tolqını, yaǵnıy Qaraqalpaqstan radiosında «Xabar» informaciyalıq baǵdarlamasında berilgen xabar informaciyalardı tıńladıq hám sol boyınsha ózlerimiz «Jańalıqlar hám analitikalıq jurnalistikası» páni oqıtıwshısı Saxibjamal Esemuratova menen ámeliy sabaqlarda analizlep shıǵıwǵa eristik. Biz tayarlaǵan prezentaciyalardan radiojurnalist qánigesi de óziniń bir qatar pikirlerin berdi. Aldaǵı waqıtta óz ústimizde islewde elede háreketimizdi kúsheytemiz. Ustazımızǵa hám seminardı shólkemlestirip beriwshilerge minnetdarshılıǵımızdı bildiremiz», – deydi bayanatshılar.

Álbette, óz taraw qánigeleri menen birge pikir alısıw imkaniyatın bergen seminar keleshekte óz nátiyjesin beredi. Ushırasıw sońında belsene qatnasqan studentler ushın Darya Osmanova hám Emil Fixreevtiń «Data-jurnalistika qánigelikke dáslepki qádemin taslap atırǵanlar ushın ámeliy kursqa» atlı kitap-toplamı menen sıylıqlandı.

Nesibeli Baltaniyazova