Xalqımızda «Ustaz-atańday ullı», «Bilim bergen ustazıńa raxmet» degen danalıq gápler bar. Demek, «ustaz» degen atqa erisken adamǵa hár tárepleme joqarı juwapkershilik júkletiledi. Hár qanday kásipke erisiw ushın ustazdıń ornı áhmiyetli.
Usınday ustazlardıń biri el súygen insan Ózbekstan qaharmanı, Fizika-matematika ilimleriniń doktorı, professor, Ózbekstan Respublikası Ilimler Akademiyasınıń akademigi, Ózbekstan Respublikası ilim ǵayratkeri, Ózbekstan Respublikası ilim hám texnika tarawındaǵı Birinshi dárejeli Mámleketlik sıylıqtıń laureatı, Ózbekstan Respublikası Oliy Majlis Senat aǵzası, Ózbekstan Respublikası Ilimler Akademiyası V.I.Romanovskiy atındaǵı Matematika institutınıń direktorı Shavkat Abdullaevich Ayupov bolıp esaplanadı. Ustaz hár jılı Qaraqalpaq mámleketlik universitetiniń matematika fakultetine kelip fakultet jas izleniwshi, doktorant, magistrantlar, ziyrek studentlerǵe lekciya hám seminar sabaqların ótiwdi dástúrge aylandırǵan.
Búgingi kúnde de ullı ustaz fakultetimizge kelip óziniń lekciya sabaqların ótpekte. Sonıń menen birge Ustaz ilimiy seminarlar shólkemlestirip, fakultetimizdegi matematikanıń hár túrli tarawı boyınsha ilimiy jumıs islep atırǵan jas izleniwshilerdiń bayanatların tıńlap, olarǵa jol jobalar kórsetip másláhátlerin berip kelmekte. Akademik Sh.A.Ayupov mektebinen jetilisip shıqqan eki ilim doktorı, 10ǵa shamalas ilim kandidatları hám filosofiya doktorları tek ǵana fakultetimizde emes, pútkil respublikamızda matematika ilimin rawajlandırıwda salmaqlı úles qosıp kelmekte.
Ustazlarǵa húrmet ata babalarımızdan miyras bolıp kiyatırǵan ullı qadiriyatlarımızdan sanaladı, Ózgelerge bilim, máripat nurın shahıw ullı hám sawaplı ámellerden biri. Bul wazıypaǵa shın kewilden berilgen insannıń dárejesi de sheksiz joqarı boladı. Biz shákirtler ustazımızdı ullı hám joqarı mártebeli insan ekenliklerin shın kewlimizden isenemiz. Ómirimzdiń aqırına shekem bul ustazdı izzet-húrmetin ornına qoyıp xızmetlerinde bolıwımız shákirtlik wazıypamız esaplanadı. Qalaberse, ustazımızdıń bergen altınǵa teń másláhatlerı bizlerdiń ullı shaxs bolıwımızda kúsh-quwat boladı. Ustazımızǵa, Qaraqalpaq mámleketlik universiteti jámááti, qalaberse bárshe shákirtleri atınan sheksiz minnetdarshıliq bildirip, bekkem den-sawlıq, ilimiy hám jámiyetlik jumıslarında talmas kúsh ǵayrat, shańaraǵına amanlıq hám awızbirshilik tilep qalamız!
A.X. Allambergenov
QMU, Funkcionallıq analiz, algebra hám geometriya kafedrası assistenti
