Ózbekstan Respublikası Prezidentiniń «Ózbekstan-2030» strategiyası «Jaslar hám biznesti qollap-quwatlaw» mámleketlik baǵdarlaması orınlanıwın támiyinlew sonday-aq, jaslar menen islesiwdiń jańa sistemasın jaratıwǵa qaratılǵan reformalardı úgit-násiyatlaw, student-jaslardıń siyasiy-huqıqıy bilimlerin jetilistiriw, olardı sociallıq jaqtan qollap-quwatlaw menen birge kásip-ónerge oqıtıw, bántligin támiyinlew, maqsetinde búgin 6-may kúni Berdaq atındaǵı Qaraqalpaq mámleketlik universitetinde bos jumıs orınları yarmarkası ótkerildi.
Onda Qaraqalpaqstan Respublikası Turizm basqarması qanigesi J.Artikov, Ámiwdárya mámleketlik biosfera rezervatı ilimiy qánigesi S.Karamatdinov, «Nurprom jıl stroy» kárxanası direktorı T.Ámetov, «Aqmanǵıt trans» kóp tarmaqlı kishi kárxanası direktorı A.Nuratdinov jumıs beriwshi kárxana hám shólkemlerden wákiller, student-jaslar qatnastı. Dáslep ilajdı universitet rektorı A.Reymov kiris sóz benen ashtı. Ol óz sózinde búgingi kúnde elimizde jaslardıń joqarı bilim alıp, ózleriniń qánigelikleri boyınsha jetik kadrlar bolıp jetilisiwleri ushın jaratılǵan imkaniyatlar haqqında keń túrde maǵlıwmatlar berip ótti. Sonday-aq, búgingi bos jumıs orınları miynet yarmarkasında, bos jumıs orınları menen qatnasıp atırǵan mákeme-kárxana hám shólkemlerdiń basshılarına universitet jámááti atınan óz minnetdarshılıǵın bildirdi. Bunnan soń, sózge shıqqanlar Húrmetli Prezidentimiz tárepinen mámleketimizde eńgizilip atırǵan reformalardı ámelge asırıwda zamanagóy bilimge iye bolǵan jas kadrlardı jetilistiriw olardıń bántligin támiyinlew oǵada áhmiyetli ekenligin aytıp ótti.
Búgingi ótkerilgen bos jumıs orınları miynet yarmarkasına Berdaq atındaǵı Qaraqalpaq mámleketlik universitetinen 1500 den aslam studet-jaslar qatnasıp, sonnan 170 student-jaslar menen jumıs beriwshiler ortasında jumısqa qabıllaw boyınsha úsh tárepleme shártnamalar dúzildi.
Maǵlıwmat ushın student-jaslardıń bántligin támiyinlew maqsetinde ótkerilgen bos jumıs orınları miynet yarmarkasında 80 nen aslam mákeme, kárxana hám shólkemler ózleriniń 350 bos jumıs orınları menen qatnastı.
QMU baspasóz xızmeti
