Elimizde jas áwladtıń fizikalıq hám ruwxıy jaqtan salamat bolıp ósiwi, sonıń menen birge olardıń bos waqıtların mazmunlı shólkemlestiriw hám de jaslardı ǵalabalıq sportqa keńnen qamtıw boyınsha bir qatar reformalar ámelge asırılmaqta. 9-may – «Eslew hám qádirlew» kúni múnásibeti menen, sonday-aq, Ózbekstan Respublikası Ministrler Kabinetiniń 2018-jıl 3-may kúngi «Júziw sport túrlerin rawajlandırıw is-ilajları haqqında»ǵı 333-sanlı qararınıń orınlanıwın támiyinlew, jaslardı fizikalıq jaqtan shınıqtırıw hám de sport tarawındaǵı qábiletlerin júzege shıǵarıw ushın zárúr shárayatlar jaratıw maqsetinde usı jıl 7-may kúni Dene mádeniyatı fakulteti studentleri (erler) arasında sporttıń Júziw túri boyınsha fakultet birinshiligi ótkerildi.
Jarıs eresekler arasında shólkemlestirilip, oǵan 80 nen aslam studentler qatnastı. Jarıs qızǵın bellesiwlerge bay bolıp, jaslardıń júziw sportına bolǵan qızıǵıwshılıǵı, olardıń sport sheberlikleri sınaldı. Jarısqa tájiriybeli sportshılar, dene mádeniyatı teoriyası hám metodikası kafedrası professor-oqıtıwshıları, yaǵnıy bas tóreshi A.Qazaqbaev, járdemshi tóreshilerden N.Akimov, S.Eliusinovlar tóreshilik etti. Jarıs tóreshiler tárepinen tárepinen ádil bahalanıp, jeke birinshilik boyınsha I-orındı 206-topar studenti M.Abdijaliev, II-orındı 108-topar studenti Q.Azimov, III-orındı 202-topar studenti R.Qutlımuratovlar jeńip alǵan bolsa, al 4×50 estafeta boyınsha I-orındı 201-topar studentleri, II-orındı 108-topar studentleri, III-orındı 101-topar studentleri jeńip alıwǵa miyasar boldı.
Jarıs jeńimpazları shólkemlestiriwshiler tárepinen tayarlanǵan estelik sawǵaları menen sıylıqlandı.
Ótkerilgen jarıstıń tiykarǵı maqseti student-jaslar arasında salamat turmıs tárizin qáliplestiriw, sporttıń júziw túrin jáne de rawajlandırıw hám en jaydırıw, jaslardıń júziw sport túrine bolǵan qızıǵıwshılıqların arttırıw, olardıń sport sheberligin asırıw, qábiletli sportshılardı anıqlaw bolıp tabıladı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
