Xabarıńız bar, sońǵı waqıtları universitetimizdiń Xalıq aralıq baylanısı keńeyip, shet el joqarı oqıw orınları professor-oqıtıwshıları arasında tájiriybe almasıw, ilimy jumıslardı birgelikte orınlaw, alıp barıw boyınsha nátiyjeli jumıslar alıp barılmaqta. Kelgen shet elli miymanlar universitetimiz turmısı, úlkemizdiń tariyxı hám mádeniyatı, dıqqatqa ılayıqlı jámiyetlik orınların menen de qızıqsınıp olar menen tanısıw jumısların alıp barmaqda.

Usı jıldıń 14-may kúni Berdaq atındaǵı Qaraqalpaq mámleketlik universiteti quramındaǵı Repressiya qurbanların eslew muzeyinde Qazaqstan Respublikası Semey qalası, Alian Bokeyxan universiteti professor-oqıtıwshıları pedagogika ilimleri kandidatı Isakova Marjan Orazgalievna, pedagogika ilimleri boyınsha filosofiya doktorı PhD Orıngalieva Sholpan Oralgalievna, pedagogika ilimleri boyınsha filosofiya doktorı PhD Ospanova Bibigul Kanaatovlar bolıp, muzeydiń kórgizbe zalındaǵı eksponatlar menen tanıstı. Onda muzey direktorı A.Qudiyarov muzeydiń Orta Aziyanı patsha Rossiyası tárepinen basıp alınıwı (kolonial dáwiri), XIX-XX ásir baslarındaǵı xalıq azatlıq háreketleri, 1940-1950 jıllardaǵı repressiyalar, 1980-jıllardaǵı repressiyalar- “Paxta isi” kompaniyası dáwiri ekspoziciyasınıń qurlısı menen keń túrde tanıstırıp ótti, kelgen miymanlar Qazaqstan Respublikasındaǵı muzeyler menen salıstırıp ózleriniń bahalı másláhátlerin berip, muzeydiń húrmetli miymanlar kitabına óziniń pikir usınısların jazıp qaldırdı.

Amina Mambetkarimova
Muzey xızmetkeri.