Búgin 16-may kúni Joqarı bilimlendiriw, ilim hám innovaciyalar ministriniń orınbasarı Sarvarxon Buzrukxonov Qaraqalpaqstan Respublikasına bolǵan xızmet saparında Berdaq atındaǵı Qaraqalpaq mámleketlik universitetinde bolıp, bul jerde jańadan boy tiklep atırǵan studentler turar jayınıń qurılısın kózden ótkerdi. Dáslep, ministr orınbasarı házirgi waqıtta jumısları dawam etip atırǵan 400 orınlıq studentler turaq jayında ámelge asırılıp atırǵan qurılıs jumısları menen tanısıp, bul jerde jaslardıń bos waqıtların mazmunlı ótkeriw, awqatlanıw, sonday-aq, basqa da sharayatlardı jaratıw baǵdarındaǵı jumıslar boyınsha universitet rektorı A.Reymov jáne basqa da juwapkerler menen sáwbetlesip, tiyisli tapsırmalar berdi. Bunan soń, S.Buzrukxonov qurılıstı belgilengen waqıtta sapalı etip juwmaqlaw boyınsha tiyisli juwapkerlerge kórsetpeler berdi.
Ámelge asırılıp atırǵan qurılıs jumısların kózden ótkeriw barısında, Qaraqalpaqstan Respublikası Ministrler Keńesiniń Baslıǵınıń orınbasarı B.Ótemuratov, Qaraqalpaqstan Respublikası Joqarı bilimlendiriw, ilim hám innovaciyalar ministri B.Kaipbergenov, Berdaq atındaǵı Qaraqalpaq mámleketlik universiteti rektorı A.Reymov, universitettiń Qarjı isleri boyınsha prorektor A.Qudaybergenovlar qatnastı.
Maǵlıwmat ushın; bul jańadan boy tiklep atırǵan studentler turar jayı Ózbekstan Respublikası Ministrler Kabinetiniń 2021-jıl 9-sentyabrdegi «Respublika joqarı bilimlendiriw mákemelerinde studentlerdi turar jay menen qamtıp alıw dárejesin asırıw ilajları haqqında»ǵı 563-sanlı qararına tiykarlanıp universitettiń byudjetten tısqarı qarjıları esabınan 6-sanlı oqıw imaratı (Arxitektura fakulteti) aymaǵınan 400 orınǵa mólsherlengen Studentler turar jayı imaratı jańadan qurıw boyınsha 2023-jıl 16-avgust kúngi ótkerilgen “Shaffof qurilish” elektron tenderi arqalı “ELLIKQALA MAXSUS QURILISH” JShJ qurılıs mákemesi tárepinen 22,662 mlrd.sumǵa shártnamalar rásmiylestirildi hám qurılıs jumısları jedellik penen alıp barılmaqta.
QMU baspasóz xızmeti
