Usı jıldıń 17-may kúni Berdaq atındaǵı Qaraqalpaq mámleketlik universiteti májilisler zalında Málimleme xızmeti hám jámiyetshilik penen baylanıslar baǵdarı jumısların ele de rawajlandırıw, tarawǵa jańa tendenciyalar, jańalıqlardı alıp kiriw maqsetinde ilaj shólkemlestirildi. Onda universitet adminstraciyası, mámleketlik mákeme, shólkem Málimleme xızmeti qánigeleri, universitettiń barlıq Málimleme xızmeti hám jámiyetshilik penen baylanıslar baǵdarı studentleri hám olardıń ata-anaları qatnastı. Ilajdı Qaraqalpaq filologiyası hám jurnalistika fakulteti dekanı Q.Turdıbaev ashıp berdi. Bunnan soń, Qaraqalpaqstan Respublikası Ministrler Keńesi Málimleme xızmeti baslıǵı B.Xojanov sózge shıǵıp, «Internet PR» páni sheńberinde alıp barılǵan joybarǵa joqarı baha berip bul baǵdardaǵı jumıslardı dawm ettiriw kerekligin aytıp ótti. Sonıń menen birge, ilajda Cambridge universiteti bilimlendiriw standartları tiykarında «Internet PR» páni sheńberinde alıp barılǵan joybardıń esap beriw ilajında 3-basqısh studentleri 4 ay dawamında ózlerine biriktirilgen óndiris orınlarınan tayarlanǵan PR kontentlerdi auditoriyaǵa kórsetti. Hár bir kontent formatları boyınsha qosımsha maǵlıwmat berilip, olar sociallıq tarmaqlardaǵı platformalarǵa jaylastırıldı. Platformalarǵa kirgizilgen materiallar Ózbekstandaǵı arnawlı media ekspertler tárepinen analizlenip, joqarı bahalandı. Ilajda óndiris orınları qánigeleri de qatnasıp, studentlerdiń jumıslarına baha berdi. «Storytelling, Storiy-story, waqıyalı kontent, PR maqala» sıyaqlı 15 kontent formatları prezentaciyası auditoriya tárepinen qızıǵıwshılıq penen kútip alındı. Platformaǵa jaylastırılǵan materiallar mámleketlik mákeme hám shólkemniń Málimleme xızmeti qánigeleri tárepinen de jaqsı bahalandı. Kelesi jıl oqıw dárgayı, óndiris ornı baylanısın sabaqlar kesiminde ele de bekkemlew lazımlıǵı boyınsha usınıslar kirgizildi. Platforması jaqsı bahalanǵan studentlerge diplom, sawǵalar tapsırıldı. Teoriyalıq sabaqlardı óndiris ornında integraciya etiw boyınsha jumıslardı ele de rawajlandırıw zárúrligi aytıp ótildi.
Maǵlıwmat ushın, ilajǵa Qaraqalpaqstan Respublikası Joqarǵı Keńesi Málimleme xızmeti, Qaraqalpaqstan Respublikası Ministrler Keńesi Málimleme xızmeti hám basqa bir qatar ministrlik jáne mákemelerdiń wákiller qatnastı.
