Búgin 20-may kúni Berdaq atındaǵı Qaraqalpaq mámleketlik universitetinde Qaraqalpaqstan Respublikasına miyneti singen ilim ǵayratkeri, Beruniy atındaǵı mámleketlik sıylıqtıń laureatı, filosofiya ilimleriniń doktorı, professor Seytov Polat Dawletovich tuwılǵanlıǵınıń 90 jıllıǵına arnalǵan “Dialektika hám házirgi zaman filosofiyasınıń aktual máseleleri” atamasında respublikalıq ilimiy – ámeliy konferenciya bolıp ótti. Onda ilimpazlar, professor-oqıtıwshılar, jaqınları, shákirtleri, doktarantlar hám student-jaslar qatnastı. Konferenciyanı Tariyx fakulteti dekanı S.Sulaymanov ashıp berdi hám alıp bardı. Ol óz sózinde P.Seytovtıń elimizde filosofiya iliminiń rawajlanıwına pidayı xızmet etkenligi, ol óziniń miynetkeshligi, joqarı dárejedegi bilimi arqalı xalıq abırayına eriskenligin ayrıqsha atap ótti.
Bunnan soń «Sociallıq pánler» kafedrası baslıǵı professor A.K.Berdimuratova «professor Polat Seytovtıń Qaraqalpaqstanda filosofiya iliminiń rawajlanıwındaǵı ornı», F.i.k., docent M.A.Yakubov «Professor Polat Seytovtıń Qaraqalpaq mámleketlik universitetindegi iskerligi», F.i.k.,docent S.Abaev «Professor Polat Seytov húrmetli ustaz sıpatında», «Sociallıq pánler» kafedrası docenti. A.D.Baymurzaev «Polat Seytov dialektikanıń pidayısı» temalarında bayanatlar isledi. Sonday-aq, konferenciyada sózge shıqqanlar professor P.D.Seytovtıń ómir jolı, ilimiy jumısları menen bir qatarda jámiyetlik jumıslarda alıp barǵan xızmetleri haqqında jıynalǵanlarǵa keń túrde maǵlıwmat berip ótti. Ásirese onıń dialektika boyınsha tek ģana Qaraqalpaqstanda emes, Ózbekstan hám burınģı awqam mámleketleri ishinde de eń kúshli ilimpaz ekenligi, onıń jaratqan ilimiy jolı hám izertlewleri qunlılıģı hám aktuallıģı joqarı ekenligin maqtanısh penen tilge aldı. Konferenciyaģa Polat Seytovtıń qızı Ózbekstan Respublikası Oliy Majlis nızamshılıq palatası deputatı, e.i.k., doc. L.P.Seytova da qatnasıp universitet jámáátine ákesine bolģan húrmet ushın óz minnetdarshılıģın bildirdi.
Maǵlıwmat ushın: “Beruniy” atındaǵı mámleketlik sıylıqtıń iyesi, Qaraqalpaqstanǵa miyneti sińgen ilim ǵayratkeri, filosofiya ilimleri doktorı, professor Polat Dawletovich Seytov 1934-jılı Qaraqalpaqstan Respublikasınıń Xojeli rayonında tuwılǵan. 1953-1958 jıllarda Moskva mámleketlik universitetinde tálim aladı. 1964-jılı Moskva mámleketlik universitetinde aspiranturanı pitkerip kandidatlıq jumısın tabıslı qorǵaydı. 1964-1976-jıllarda Qaraqalpaq mámleketlik pedagogikalıq institutında ilmiy isler boyınsha prorektor lawazımında islep, kóplegen qánigelerdi ilmiy jumısların kúsheytiw ushın Kiev hám Moskva qalalarına jiberiwde belsendilik etken. 1979-1999-jıllar aralıǵında Qaraqalpaq mámleketlik universiteti filosofiya kafedrasında dáslep docent, keyinshelik kafedra baslıǵı lawazımlarında iskerlik alıp barǵan. 1996-jılı Tashkent qalasında Ózbekstan ilimler filosofiya hám huqıq institutında «Dialektikanıń sistemalılıǵı» atamasında doktorlıq jumısın qorǵaydı. Usı miyneti ushın alım «Beruniy» atındaǵı sıylıqqa múnásip dep tabıladı.
Seytov 2000-jıldan baslap Tashkent mámleketlik pediatriya institutınıń Nókis filialında kafedra baslıǵı, keyinshelik professor lawazımlarında jumıs alıp bardı. Professor P.Seytov tek ǵana Qaraqalpaqstan yamasa Ózbekstan kóleminde emes, al burınǵı Awqam kólemindegi filosofiya ilimindegi belgili tulgalardıń biri edi. Bunı biz ilimpazdıń filosofiya ilimi boyınsha aldınǵı ilmiy jurnallarındaǵı maqalaları hám Seitovtıń ilmiy kóz-karaslarına Awqamnıń tán alınǵan filosoflarınıń múnásebetinen kórsek boladı.
