Turkiya mámleketiniń Ege universitetindegi Túrkiy xalıqlar dúniyası ilimiy –izertlew institutı professorı Pinar Fidakar, docent Sechkin Sarpkaya, assistent-oqıtıwshı Amine Sarpkayalar Qaraqalpaq mámleketlik universitetinde xızmet saparı menen bolmaqta. Xızmet saparı dawamında miymanlar universitet rektorı, akademik A.Reymov penen ushırasıp, sáwbetlesiwler alıp bardı.

Sáwbetlesiw barısında rektor A.Reymov Ege universiteti menen házirgi waqıtta birge islesiwler jaqsı jolǵa qoyılǵanlıǵı, bul baǵdardaǵı jumıslardı elede dawam ettiriw, sonday-aq, eki universitet ortasında professor-oqıtıwshılardıń tájiriybe almasıwları qospa ilimiy joybarlardı ámelge asırıw, konferenciyalar, seminarlar hám lekciyalar shólkemlestiriw, qospa tálim joybarları boyınsha birgelikte izertlew jumısların alıp barıwdı rawajlandırıw hám tálim programmaların islep shıǵıw onı oqıw processine engiziw kerekligin aytıp ótti.

Maǵlıwmat ushın; Ege universitetindegi Túrkiy xalıqlar dúniyası ilimiy –izertlew institutı ilimiy-izertlew ortalıǵı bolǵanlıǵı sebepli, ol jerde magistrantlar menen PhD doktorantları bilim aladı. Institutda túrkiy xalıqlardıń filologiyası, tili, folklorı, ádebiyattanıwı, siyasiy bilimleri, tariyxı, etnografiyası boyınsha ilimiy – izertlew jumısları alıp barıladı. Eń áhmiyetlisi, bul institutda qaraqalpaq ádebiyatı menen folklorı da belgili ilimpazlar tárepinen izertlenip atır.

QMU baspasóz xızmeti