Sońǵı jılları elimizde ilim hám bilimlendiriw tarawın rawajlandırıwǵa ayrıqsha itibar qaratılmaqta. Bul Prezidentimizdiń 2017-jıl 20-apreldegi «Joqarı bilimlendiriw sistemasın jáne de rawajlandırıw is-ilájları haqqında» ǵı PQ-2909-sanlı hám 2018-jıl 5-iyundaǵı «Joqarı oqıw orınlarında bilim beriw sapasın asırıw hám olardıń mámlekette ámelge asırılıp atırǵan keń kólemli reformalarda jedel qatnasıwın támiyinlew boyınsha qosımsha is-ilájları haqqında» ǵı PQ-3775-sanlı qararlarında óz kórinisin tapqan. Usı qararlardıń orınlanıwın támiyinlew maqsetinde Qaraqalpaq mámleketlik universitetinde sırt el joqarı oqıw orınları menen birge islesiw Memorandumı tiykarında oqıw-metodikalıq, ilim-izertlew hám tájiriybe almasıw jumısları ámelge asırılmaqta.
Atap aytqanda 2024-jıldıń 13-may sánesinen baslap Qaraqalpaq mámleketlik universitetiniń Biologiya fakultetinde Turkiyanıń Ege universiteti docenti LUC ORTAC ONMUS xızmet saparında boldı. Dáslep Turkiyalı miyman 1 hápte dawamında Ekologiya hám qorshaǵan ortalıqtı qorǵaw tálim baǵdarı 2-kurs studentlerine 18 saat kóleminde Oqıw-dala ámeliyatına basshılıq etti. Sonıń menen bir qatarda fakultettiń zoolog, ekolog hám ornitolog professor oqıtıwshıları, magistr hám doktorantları menen birge Túslik Aral boyı quslarınıń bioekologiyası boyınsha ilim-izertlew jumısların alıp bardı.
Usı jıldıń 21-may kúni Biologiya fakultetinde Turkiyanıń Ege universiteti docenti LUC ORTAC ONMUS qatnasında ilimiy seminar ótkerildi. Ilimiy seminarǵa Qaraqalpaq mámleketlik universiteti xalıqaralıq birge islesiw boyınsha prorektorı Timur Nurımbetov, Biologiya fakulteti professor-oqıtıwshıları, doktorantlar, magistrantlar, student-jaslar hám ǵalaba xabar quralları wákilleri qatnastı.
Seminar barısında ORTAC ONMUS Ege universitetiniń tariyxı, duzilisi, kafedralar quramı, universitette shólkemlestirilgen tábiyat muzeyi, ondaǵı eksponatlar haqqında, Biologiya kafedrasında islenip atırǵan ilimiy jumısları haqqında keń túrde túsinik berdi. Sonday-aq keleshekte Qaraqalpaq mámleketlik universiteti menen birge islesiw rejeleri haqqında aytıp ótti. Ilimiy seminar soraw-juwap formasında dawam etip qatnasıwshılar ózlerin qızıqtırǵan sorawlarına juwaplar aldı.
Ametov Yakub Idrisovich
Qaraqalpaq mámleketlik universiteti
Biologiya fakulteti dekanı,
biologiya ilimleri doktorı, professor
