Pikir hám tájiriybe bilimlendiriwdi rawajlandıradı. Mine usı maqsette Shet tilleri fakulteti inglis til bilimi kafedrası professor-oqıtıwshıları tájiriybe almasıw, olardı en jaydırıw boyınsha Moynaq rayonı qánigelestirilgen mektebinde ilimiy-metodikalıq seminar shólkemlestirdi. Seminar shet tilleri fakulteti dekanı Dj.Kurbanbaev, inglis til bilimi kafedrası baslıǵı G.Djoldasova, inglis til bilimi kafedrası oqıtıwshıları M.Kalabaeva, E.Erimbetova, M.Alimbaevlar tárepinen alıp barıldı.
Dáslep, seminar shólkemlestiriwshileri Ózbekstan Respublikası Ministrler kabinetiniń shet tillerin úyreniwdi en jaydırıw agentligi hám bilim sıpatın qadaǵalaw mámleketlik inspekciyasınıń qararı boyınsha shet tillerin biliw dárejesin bahalawshı dizimge alınǵan milliy hám xalıqaralıq sertifikatlar dizimi haqqında tanıstırıp ótip, C1, B2 dárejeli milliy hám xalıqara sertifikatlarına iye bolıw, onıń imkániyatları haqqında seminar qatnasıwshılarına keń túsinik berip ótti.
Seminar dawamında inglis tili sabaqların qızıqlı hám mazmunlı alıp barıw, sonday-aq, oqıwshılardıń dıqqatın tartatuǵın, zamanagóy, interaktiv, innovaciyalıq metodlardan paydalanıp sabaq ótiwge arnalǵan shınıǵıwlar qollanılıp, mektep oqıtıwshıları seminarǵa úlken qızıǵıwshılıq penen qatnastı.
Bul usıllar arqalı oqıtıwshılar oqıwshılardıń shet tilin úyreniwge bolǵan qızıǵıwshılıǵın arttırıwı, sóz baylıǵın jetilistiriw, olardıń til kónlikpelerin rawajlandırıwǵa qaratılǵanlıǵın aytıp ótti. Seminar juwmaǵında oqıtıwshılar joqarıda qollanılǵan metodlardan sabaq barısında paydalanıw boyınsha óz ara pikir hám tájiriybe almastı. Bunday seminarlardıń ótkerilip turılıwı professor-oqıtıwshılarda jańa idealardıń payda bolıwına túrtki boladı.
Dilfuza Badirova
Inglis til bilimi kafedrası assistenti
