Xabarıńız bar, búgin 23-may kúni Namangan injenerlik-texnologiya institutı baslaması menen Ózbekstan – 2030» strategiyası sheńberinde ilimiy hám innovaciyalıq iskerlik ushın zamanagóy infrastruktura jaratıw, ilim hám islep shıǵarıw integraciyasın bekkemlew maqsetinde «Akademik hám jaslar: ilim rawajlanıwın jaslar jaratadı» temasında akademikler hám jaslar kongressi bolıp ótti. Ózbekstannıń jetekshi joqarı oqıw orınları rektorları, Akademikler, professorlar, ilimiy izertlew jumısların alıp barıp atırǵan 200 ge jaqın ilim wákilleri qatnastı.
Kongreste Berdaq atındaǵı Qaraqalpaq mámleketlik universiteti rektorı, akademik A.Reymov «Mineral tóginler alıw texnologiyaları hám qollanıwı» temasında bayanat jasadı. Sonday-aq, mineral hám azotlı tóginlerdiń klassifikaciyası, dúnyada mineral tóginler eksportı, olardı paydalanıwdıń abzallıqları hám kemshilikleri, ammiaklı selitra hám fosforitler tiykarında quramalı azotfosforlı tóginlerdi alıw texnologiyası haqqında tolıq maǵlıwmatlar berildi.
Kongresstiń maqseti: Akademiklerdi jaslar arasında tanıtıw, olardıń xızmetleri, ilimiy jumısların keń úgit násiyatlaw, jas ilimpazlar hám ziyrek studentler arasında zamanagóy bilimlerdi iyelew, ilim alıwǵa bolǵan qızıǵıwshılıqların jetilistiriw, olarǵa ilimiy motivaciya beriw, jetekshi ilimpazlar, jas ilimiy xızmetkerlerdiń iskerligi hám ilimiy izertlewlerin qollap-quwatlaw tiykarında “Ózbekstan – 2030” strategiyası sheńberinde ilimiy hám innovciyalıq iskerlik ushın zamanagóy infrastrukturalar jaratıw, ilim hám islep shıǵarıw integraciyasın bekkemlew.
«Ilimsiz keleshek joq» ideyası tiykarında keleshek ushın jobalar islep shıǵıw, jaslar arasında ilim alıw, zamanagóy bilim hám kónlikpelerdi iyelewge bolǵan qızıǵıwshılıqtı asırıw, búgingi kún talaplarınan kelip shıǵıp, barlıq tarawlarǵa ilimiy ideyalardı qollaw hám olardı turmısqa engiziw bolıp tabıaldı.
QMU baspasóz xızmeti
