Xabarıńız bar, usı jıldıń 23-may kúni Namangan qalasındaǵı “Máripat máskanı”nda Ózbekstan – 2030» strategiyası sheńberinde ilimiy hám innovaciyalıq iskerlik ushın zamanagóy infrastruktura jaratıw, ilim hám islep shıǵarıw integraciyasın bekkemlew maqsetinde «Akademik hám jaslar: ilim rawajlanıwın jaslar jaratadı» temasında akademikler hám jaslar kongressi bolıp ótti.

Kongress sheńberinde orınlarda «Akademik hám jaslar»ushırasıwları ótkerilip, onda Berdaq atındaǵı Qaraqalpaq mámleketlik universiteti rektorı, akademik Reymov Axmed Mambetkarimovich Namangan injenerlik-texnologiya institutı student-jasları menen ushırastı.

Ushırasıwda akademik A.Reymov instituttıń Ximiya -texnologiya, Avtomatika hám energetika fakulteti studentleri menen sáwbetlesip, búgingi kúnde elimizde bilimlendiriw sistemasına qaratılıp atırǵan itibar, ásirese jaslarımızǵa berilip atırǵan imkaniyatlar, sonday-aq ilim jolınıń mashaqatları, tabısları haqqında ushırasıw qatnasıwshılarına maǵlıwmatlar berdi. Ushırasıw dawamında studentler ózlerin qızıqtırǵan sorawlarǵa hár tárepleme juwaplar aldı.

QMU baspasóz xızmeti