Usı jıldıń 23-24-may kúnleri Namangan qalasındaǵı “Máripat máskanı”nda «Akademik hám jaslar: ilim rawajlanıwın jaslar jaratadı» temasında akademikler hám jaslar kongressi bolıp ótti. Kongress sheńberinde Berdaq atındaǵı Qaraqalpaq mámleketlik universiteti rektorı, akademik A.Reymov Namangan injenerlik-texnologiya institutında bolıp, bul jerde Húrmetli Prezidentimizdiń 2022-jıl 31-avgusttaǵı 213-sanlı pármanı tiykarında oqıp atırǵan qaraqalpaqstanlı jaslar menen ushırasıp, sáwbetlesti.

Sáwbetlesiw barısında A.Reymov elimizde ámelge asırılıp atırǵan keń kólemli reformalar, bilimlendiriw tarawına qaratılıp atırǵan itibar, ásirese jaslarımızǵa berilip atırǵan imkaniyatlar haqqında turmıslıq mısallar arqalı túsinikler berdi. Ushırasıw dawamında student-jaslarda sózge shıǵıp, usınday imkaniyat jaratıp bergeni ushın Húrmetli Prezidentimizge óz minnetdarshılǵın bildirdi.  

Maǵlıwmat ushın; 2022-jıl 31-avgusttaǵı 213-sanlı Prezident pármanı menen Qaraqalpaqstan Respublikasında turaqlı jasaytuǵın hám ulıwma orta, orta arnawlı hám professional bilimlendiriw mákemelerin pitkergen jaslar ushın 2023-2024-oqıw jılında mámleketlik grant tiykarında qosımsha 3 mıń kvota, sonıń menen birge, tólemli kontrakt tiykarında qosımsha 6 mıń 500 kvota ajıratılǵan edi.

Párman menen qaraqalpaqstanlı 6 500 jastıń qosımsha kvota tiykarında mámleketlik joqarı oqıw orınlarına oqıwǵa kiriwi hám joqarı bilim alıwı ushın imkaniyat jaratılıwı belgilengen bolıp, bıyılǵı jılı da qosımsha kvotalar ajıratıladı.

QMU baspasóz xızmeti