Aldın xabar bergenimizdey, búgin Paytaxtımız Nókis qalasında jaylasqan Sawda-sanaat palatası basqarmasınıń májilisler zalında “Xalıqaralıq hám jergilikli grant joybarlarına qatnasıw” oqıw-seminarınıń ekinshi kúni bolıp ótti. Bunnan soń, Qaraqalpaqstan Respublikası Joqarǵı Keńesiniń komitet baslıǵı T.Romanov, Qaraqalpaqstan Respublikası Ruwxıy-aǵartıwshılıq orayınıń baslıǵı T.Atamuratov, Berdaq atındaǵı Qaraqalpaq mámleketlik universiteti rektorı A.Reymov hám respublikamızdaǵı joqarı oqıw orınları, sonday-aq, qala hám rayonlardaǵı ilimiy-pedagogikalıq, óndirislik baǵdarlardıń juwapker qánigeleri qatnastı. Seminardı Qaraqalpaqstan Respublikası Joqarı bilimlendiriw, ilim hám innovaciyalar ministri B.Kaipbergenov ashıp berdi hám seminardıń kún tártibi menen tanıstırdı.

Seminarda sózge shıqqanlar hám úshinshi renesanstı qurıwshı jaslardı tárbiyalawda kerekli bolǵan jańa joybarlar jaratıwdı maqset etken búgingi seminardıń joqarı dárejede ótiwine isenim bildirdi. Eki kún dawam etken oqıw-seminarında lektorlar tárepinen densawlıqtı saqlaw, bilimlendiriw, sociallıq sala, sport, ilim, turizm, mádeniyat, kórkem óner, awıl, toǵay hám suw xojalıǵı, energetika, ekologiya, informaciyalıq texnologiyalar, sanaat, ekonomikanı, isbilermenlikti rawajlandırıw sıyaqlı tarawlarda grant joybarlarına qatnasıw boyınsha qatnasıwshılarǵa ámeliy kónlikpeler berildi.

Qaraqalpaqstan Respublikası Joqarı bilimlendiriw, ilim hám innovaciyalar ministrliginiń málimleme xızmeti.