Aldın xabar bergenimizdey, búgin 5-iyun kúni Qaraqalpaq mámleketlik universitetinde “Ata-babalarımızdıń bay miyrası hám milliy qádiriyatlarǵa tiykarlanǵan kúshli mánawiyatqa súyenemiz” atamasında ruwxıy-aǵartıwshılıq baǵdarında jumıs alıp barıp atırǵan taraw wákilleri menen ushırasıw bolıp ótti.

Onda Respublika  Respublika ruwxıylıq hám aǵartıwshılıq orayı baslıǵı, siyasiy ilimler doktorı, professor O.Xasanov, Qaraqalpaqstan Respublikası Joqarǵı Keńesiniń komitet baslıǵı T.Romanov, Respublika ruwxıylıq hám aǵartıwshılıq orayı Qaraqalpaqstan Respublikalıq bólimi baslıǵı T.Atamuratov hám  mektepke shekemgi bilimlendiriw mákemeleri, ulıwma bilim beriw mektepleri, professional tálim, joraqı oqıw orınlarınıń  ruwxıy-aǵartıwshılıq baǵdarında jumıs alıp barıp atırǵan taraw wákilleri qatnastı.

Ushırasıwdı Qaraqalpaq mámleketlik universiteti rektorı A.Reymov ashıp berdi hám alıp bardı. Dáslep sózge shıqqanlar jaslar tárbiyasında áhmiyetli bolǵan tiykarǵı máseleler haqqında toqtalıp ótti. Bunnan soń, miymanlar Berdaq atındaǵı Qaraqalpaq mámleketlik universitetinde «Mánawiyat» sektorın shólkemlestiriw boyınsha alıp barılıp atırǵan jumıslar menen jaqınnan tanıstı.

Dáslep bul jerde miymanlar universitettiń ruwxıy-aǵartıwshılıq baǵdarında alıp barıp atırǵan jumısları sonday-aq, student-jaslarınıń qolǵa kirgizgen tabısları, súwretlew hám qol óneri úlgileri menen tanıstı. Sonıń menen birge, student-jaslardıń bos waqtların mazmunlı ótkeriw ushın shólkemlestirilgen dógerekler, olardıń bilim alıw ushın Málimleme resur oraylarındaǵı jumıslar hám Repressiya qurbanların eslew muzeyi iskerligin kózden ótkerip, bul baǵdarda islenip atırǵan jumıslarǵa joqarı baha berdi.

QMU baspasóz xızmeti