Búgin, 13-iyun kúni Qaraqalpaq mámleketlik univeristeti akademiyalıq liceyinde 2023-2024-oqıw jılı 2-kurs pitkeriwshi oqıwshılarına diplom tapsırıw máresimi bolıp ótti. Onda universitet rektorı A.Reymov, oqıw isleri boyınsha prorektor O.Dúysenbaev, Qarjı isleri boyınsha prorektor A.Qudaybergenov hám licey jámááti, pitkeriwshi oqıwshılardıń ata-anaları hám keń jámiyetshilik wákilleri qatnastı.
Keshede universitet rektorı A.Reymov sózge shıǵıp, búgingi kúnde mámleketimiz tárepinen jaslarǵa berilip atırılǵan imkaniyatlar, jaslardı hár tárepleme qollap-quwatlaw, olardıń óz kásibiniń jetik qánigesi bolıp jetilisiwi ushın, barlıq shárt-shárayatlar jaratılǵanlıǵın aytıp, liceydi pitkerip atırǵan oqıwshı-jaslardı hám olardıń ata-anaların qızǵın qutlıqladı. Bunnan soń, sózge shıqqanlar liceydi pitkerip atırǵan oqıwshı-jaslar tárepinen qolǵa kirgizilgen nátiyjeler haqqında aytıp, bul jaslar keleshekte mámleketimiz ǵárezsizligin bekkemlew, watanımızdıń rawajlanıwı, elimiz tınıshlıǵı, xalqımız párawanlıǵı jolında ayanbay xızmet etetuǵın jetik kadrlar bolıp jetilsiwine isenim bildirip, olarǵa aldaǵı jumıslarında tabıslar tiledi. Ilajda pitkeriwshi oqıwshılarǵa diplomlar, olardıń ustazları hám ata-analarına húrmet jarlıqları saltanatlı túrde tapsırıldı.
Maǵlıwmat ushın; Qaraqalpaq mámleketlik universiteti akademiyalıq liceyinde 2023/2024 oqıw jılında 222 oqıwshı oqıwın tamamlamaqta. Akademiyalıq liceylerdiń 2-kurs oqıwshıları ushın shet tilin biliw dárejesin anıqlaw boyınsha hár jılı biypul test sınaqları ótkerilip kelinbekte. 2023/2024 oqıw jılında jámi 125 oqıwshı (sonnan 17 oqıwshı IELTS, 15 oqıwshı B1, 65 oqıwshı B2, 3 oqıwshı C1 dárejesindegi, tariyx páninen 4 oqıwshı, túrk tilinen 1 oqıwshı, rus tilinen 5 oqıwshı, matematika páninen 7 oqıwshı, biologiya páninen 6 oqıwshı, ózbek tilinen 2 oqıwshı milliy) sertifikatqa iye bolǵan.
Pitkeriw keshesi liceydiń talantlı oqıwshıları hám kórkem óner sheberleriniń atqarıwındaǵı koncert baǵdarlaması menen dawam etti.
