Xabarıńız bar, 2023/2024 oqıw jılı juwmaqlanıp, jańa oqıw jılına tayarlıq jumısları baslap jiberildi. Berdaq atındaǵı Qaraqalpaq mámleketlik universitetinde jańa oqıw jılı aldınan usı jıldıń 13-iyul kúni barlıq prorektorlar, fakultet dekanları, kafedra baslıqlar qatnasıwında májilis bolıp ótti.  

Májiliste universitet rektorı A.Reymov sózge shıǵıp, búgingi kúnde jaslar tárbiyasınıń áhmiyeti, bilimlendiriwdiń sapasın arttırıw, ásirese jaslarǵa zamanagóy hám sapalı bilim beriw máselesine ayırıqsha itibar qaratıw kerek ekenligi sonday-aq, universitet tárepinen «Ózbekstan – 2030» strategiyası hám 2024-jılǵa mólsherlengen Mámleketlik baǵdarlamanıń áhmiyetin keń jámiyetshilikke  úgit-násiyatlawda alıp barılıp atırǵan jumıslarǵa toqtaldı.

Dáslep jaslar tálim-tárbiyası baǵdarında ámelge asırılıp atırǵan jumıslar, oqıw processi, professor-oqıtıwshılardıń shet el qánigeleri menen tájiriybe almasıwı, scopus xalıq aralıq ilimiy hám ilimiy-texnikalıq maǵlıwmatlar bazalarınan paydalanbay atırǵanlıǵı hám orın alıp atırǵan kemshilikler haqqında toqtalıp, mashqalalardı saplastırıw boyınsha isleniwi tiyis bolǵan wazıypalar belgilep alındı.

Bunnan soń, «Ózbekstan – 2030» strategiyasında birinshi gezekte Jańa Ózbekstan ushın eń úlken investiciya esaplanǵan bilimlendiriwdi qollap-quwatlawǵa ayrıqsha itibar qaratılǵanlıǵın, ásirese joqarı oqıw orınların jáne de rawajlandırıw baǵdarında innovacialıq xızmetti engiziw, ilimiy izertlewlerdi hár tárepleme qollap-quwatlawǵa qaratılǵan maqset wazıypalar hám olardıń orınlanıwın támiyinlew áhmiyetli wazıypa sıpatında belgilep qoyılǵanlıǵın aytıp, bul baǵdardaǵı jumıslardı jaslar arasında keńnen úgit-násiyatlaw hám onıń áhmiyetin túsindiriw boyınsha juwapkerlerge tapsırmalar berdi. Májilis dawamında aldaǵı isleniwi tiyis bolǵan rejeler belgilenip alındı.

QMU baspasóz xızmeti