Xabarınız bar, usı jıl 14-iyul kúni elimiz boylap joqarı hám professional bilimlendiriw mákemelerine oqıwǵa kiriw ushın hújjetlerin tapsırǵan abiturientlerge mámleketlik test sınaqları baslandı. Búgin test sınaqlarınıń ekinshi kúni dawam etpekte. Test sınaqları Nókis qalasındaǵı 5 obektte, sonıń ishinde Berdaq atındaǵı Qaraqalpaq mámleketlik universiteti sport sarayında da bolıp ótpekte. Áyne máwritlerde, Ózbekstan Respublikası Joqarı bilimlendiriw, ilim hám innovaciyalar ministrliginen kelgen wákil R.Xudayberganov universitetiniń sport sarayında ótkerilip atırǵan test sınaqların sonday-aq, ol jerde ata-anaları ushın kútiw orınlarında jaratılǵan sharayatlardı kózden ótkerdi.
Bul jerde universitet administraciyası basshılıǵında professor-oqıtıwshılar, isshi topar aǵzaları, volontyorlar tárepinen abiturientlerdiń ata-analarınıń pikir-usınısların, sonday-aq, kewil-keypiyatın kóteriw maqsetinde koncert baǵdarlamaları shólkemlestirilmekte. Maǵlıwmat ushın, test sınaqları 25-iyul kúnine shekem hár kúni eki smenada, 1-smena 08:00 den 11:00 ge shekemgi, 2-smena 15:00 den 18:00 ge shekemgi aralıqta bolıp ótedi.
Onda abiturientler test sınaǵı ótkeriletuǵın aymaqqa test sınaǵı baslanıwınan keminde 1 saat aldın pasportı (ID-karta) hám abiturient ruxsatnaması menen keliwi tiyis. Pasport nusqası yamasa basqa hújjetler menen kelgen abiturientler test sınaqlarına kirgizilmeydi. Test sınaqları tolıq videobaqlaw astında onlayn translyaciya etilgen halda ótkeriledi hám abiturientler menen olardıń ata-anaları http://Test2024.uzcloud.uz saytı arqalı test sınaqların onlayn baqlap barıwları múmkin boladı.
QMU baspasóz xızmeti
