Sońǵı jıllarda Húrmetli Prezidentimizdiń bilimlendiriw tarawına bolǵan ayrıqsha itibarı, jaslardıń joqarı bilim alıwları ushın jaratıp atırǵan sharayatları búgingi kúnde óziniń unamlı nátiyjelerin kórsetip, student-jaslarımızǵa keń múmkinshilikler jaratılmaqta.

Usınday iygilikli islerdiń dawamı sıpatında búgin Berdaq atındaǵı Qaraqalpaq mámleketlik universiteti 4-oqıw imaratı (Ekonomika hám Qurılıs) fakulteti aymaǵınan mámleketlik-jeke menshik sheriklik joybarları tiykarında 400 orınǵa mólsherlengen jańa hám zamanagóy tiptegi studentler turaq jayınıń irge tası qalandı.

Onda Qaraqalpaqstan Respublikası Ministrler Keńesi Baslıǵınıń orınbasarı Bayram Ótemuratov, universitet rektorı Axmed Reymov, universitet jámááti, “QARAQALPAQ STROY MONTUPRAVLENIE” JSHJ kárxanası hám “QQTAMURLOYIHA MCHJ” joybarlaw institutı qánigeleri qatnastı.

Dáslep ilaj qatnasıwshıları Ózbekstan Respublikası Ministrler Kabinetiniń «Respublikalıq joqarı bilimlendiriw mákemelerinde studentlerdi turaq jay menen qamtıp alıw dárejesin arttırıw ilajları haqqında»ǵı 563-sanlı qararı tiykarında alıp barılıp atırǵan jumıslar haqqında aytıp ótti. Bunnan soń, jańa hám zamanagóy tiptegi studentler turaq jayınıń irge tası qoyılıp, qurılıs jumıslarınıń óz waqtında hám sapalı bolıp shıǵıwı ushın tilekler bildirildi.

QMU baspasóz xızmeti