Aldın xabar bergenimizdey, Qaraqalpaqstan Respublikası delegaciya aǵzaları xızmet saparı menen házirde Rossiya Federaciyası Tatarstan Respublikasında bolıp turıptı. Sapar dawamında delegaciya aǵzaları Qazan federal universitetinde boldı. Dáslep delegaciya aǵzaları universitet penen tanısıp, Qazan federal universitetiniń tariyxı muzeyin tamashaladı. Bul jerde muzeydegi eksponatlar, tariyxıy fotosúwretler hám universitet tariyxına baylanıslı maǵlıwmatlarǵa iye boldı.

Bunnan soń, delegaciya aǵzaları Qazan federal universitetiniń xalıqaralıq baylanıslar boyınsha prorektor Timirxan Alishev, xalıqaralıq baylanıslar departamenti direktorı Olga Vershinina, Psixologiya hám pedagogika institutı direktorı Aydar Kalimullin, Ekologiya hám tábiyiy resurslardan paydalanıw institutı direktorı Svetlana Selivanovskaya, Geologiya hám neft-gaz texnologiyaları institutı direktorı w.a Vladimir Silantiev hám Informaciya texnologiyaları hám intellektuallıq sistemalardı rawajlandırıw boyınsha direktor orınbasarı Irina Maksimovalar menen ushırasıp, xalıqaralıq baylanıslardı keńeytiw, joqarı oqıw ornları arasında birge islesiwdı dawam ettiriw hám aldaǵı isleniwi tiyis bolǵan ámeliy jumıslar haqqında kelisip alındı.

Ushırasıw dawamında Berdaq atındaǵı Qaraqalpaq mámleketlik universiteti rektorı Axmed Reymov Qazan federal universitetiniń xalıqaralıq baylanıslar boyınsha prorektorı Timirxan Alishev penen qospa ilimiy-izertlew hám akademik almasıw baǵdarlamaların ámelge asırıw boyınsha qosımsha shártnamaǵa qol qoyıstı.

Maǵlıwmat ornında aytıp ótiw kerek, 2021-jıl «Ózbekstan-Rossiya bilimlendiriw forumı»nda Berdaq atındaǵı Qaraqalpaq mámleketlik universiteti hám Qazan federal universiteti menen birgelikte qánigelerdi tayarlaw barısında birge islesiwdi keńeytiw, eki joqarı oqıw orınları arasında student hám professor-oqıtıwshılar almasıwı, birgelikte ilimiy hám oqıw qollanbaların jaratıw boyınsha shártnamalar dúzilip, házirde bul boyınsha ámeliy jumıslar alıp barılmaqta.

QMU baspasóz xızmeti