Tatarstan Respublikası Ilimler akademiyasında Qaraqalpaqstan Respublikası Ministrler Keńesi Baslıǵınıń orınbasarı B.Ótemuratov basshılıǵındaǵı delegaciya aǵzaları menen rásmiy ushırasıw bolıp ótti. Ushırasıwdı dáslep Ilimler akademiyası Prezidenti Rifkat Minnixonov qutlıqlaw sózi menen ashıp berdi hám delegaciya aǵzalarına Tatarstan Respublikası Ilimler akademiyasınıń tiykarǵı iskerligi haqqında qısqasha tanıstırıp ótti.
Bunnan soń, Tatarstan Respublikası Ilimler akademiyası institutları direktorları hám bólim baslıqları delegaciya aldında óz bólimleri haqqında qısqasha maǵlıwmat berip sonday-aq, bir qatar perspektivalı ilimiy joybarlar menen tanıstırdı. Sonıda atap ótiw kerek, Tatarstan Respublikası Ilimler akademiyasınıń ilimiy orayları bugingi kúnde Qaraqalpaqstan Respublikasınıń bir qatar ilimiy shólkemleri hám joqarı oqıw orınları menen óz-ara birge islesip kelmekte.
Ushırasıw dawamında Ózbekstan Respublikası Ilimler akademiyası Qaraqalpaqstan bólimi baslıǵı, Qaraqalpaq mámleketlik universiteti rektorı A.Reymov hám Tatarstan Respublikası Ilimler akademiyası Prezidenti R.Minnixonovlar birgelikte Ózbekstan Respublikası Ilimler akademiyası Qaraqalpaqstan bólimi hám Tatarstan Respublikası Ilimler akademiyası sonday-aq, Qaraqalpaq mámleketlik universiteti arasında birge islesiw memorandumın dúzdi.
Memorandumnan gózlengen baslı maqset ilim hám jańa texnologiyalardı rawajlandırıw sonday-aq, bilimlendiriw tarawlarında ilimiy joybarlardı ámeliyatqa engiziw bolıp tabıladı.
QMU baspasóz xızmeti
