Búgin Qaraqalpaqstan Respublikası prokuratura xızmetkerleri Berdaq atındaǵı Qaraqalpaq mámleketlik universiteti quramındaǵı Repressiya qurbanların eslew muzeyine arnawlı sayaxat shólkemlestirdi. Sayaxat dawamında universitetimizdin ilimiy isler hám innovaciyalar boyınsha prorektorı Izimbet Turdımambetov hám muzey direktori Alisher Qudiyarov kelgen miymanlardı kútip alıp, muzey ekspoziciyası menen keńnen tanıstırdı. Dáslep miymanlar Berdaq atındaǵı Qaraqalpaq mámleketlik universiteti quramındaǵı Repressiya qurbanlarin eslew muzeyiniń jańa ekspoziciyası, muzeydiń ashılıw tariyxı, Qaraqalpaqstan Respublikasındaǵı burınǵı awqam dáwirinde repressiyaǵa ushıraǵan mámleketlik ǵayratkerler, prokuratura xızmetkerleri, ilimpazlar diniy taraw wákilleriniń ómiri haqqında qızıqlı maǵlıwmatlarǵa iye boldı.
Ózbekstan Respublikası Bas prokurorınıń 2023-jıl 11-sentyabrdegi 40-F-sanlı biyliginde kórsetilgen repressiyaǵa ushıraǵan prokuratura xızmetkerleriniń atların tiklew hám máńgilestiriw islerin alıp barıw wazıypaların orınlaw maqsetinde “Tarixiy hotira beqiyos” atamasında Qaraqalpaqstan Republikası prokraturası tarawında miynet etip, 1930- jılları repressiyaǵa ushıraǵan xızmetkerlerdiń miynet jolı, islegen xızmetleri haqqında birinshi kitabı baspadan shıqqan edi. Sayaxat dawamında Qaraqalpaqstan Republikası prokurorı orınbasarı Oybek Shamuratov, Qaraqalpaqstan Republikası prokuraturası kadrlar bóliminiń baslıǵı Ilyas Razzaqov muzey haqqında óz pikirlerin bildirip, prokuratura tariyxına baylanıslı baspadan shıǵarılǵan “Tarixiy xotira beqiyos” kitabınıń jazılıwında ózleriniń salmaqlı úlesin qosqan muzey direktori Alisher Qudiyarovqa hám muzey ilimiy xızmetkeri Sabit Nurjanovqa óz minnetdarshılıqların bildirip, Qaraqalpaq mámleketlik universiteti quramındaǵı Repressiya qurbanlarin eslew muzeyine kitaptı saltanatlı túrde tapsırdı.
Bul kitapqa Qaraqalpaqstan Respublikası aymaǵında repressiyaǵa ushıraǵan prokurorlardan Qarabay Ermanov, Kóptilew Nurmuhammedov, Ajimurat Musaev, Saparbay Nurjanov, Pirmaǵambet Kayipnazarov, Allanazar Pirnazarov, Mirzaǵul Babaev, Xalmurat Temirxanov, Duken Nazarovlar tuwralı maǵlıwmatlar keltirilgen. Keleshekte bul kitaptıń keyingi bólimlerinde Qaraqalpaqstan Republikası prokuraturası tarawında xızmet islep repressiyaǵa ushıraǵan basqada xızmetkerlerdiń ómir jolı, islegen xızmetleri haqqında maǵlıwmatlar berilip barıladı.
