Xabarıńız bar, búgingi kúnde barlıq joqarı oqıw orınlarında jańa oqıw jılına tayarlıq jumısları qızǵın túrde alıp barılmaqta. Óytkeni bul procesti durıs shólkemlestiriw oqıw jılın tabıslı baslaw hám joqarı nátiyjelerge erisiwde úlken áhmiyetke iye bolıp tabıladı.

Usı tiykarda búgin 5-sentyabr kúni jańa oqıw jılına tayarlıq processlerin kózden ótkeriw maqsetinde Ózbekstan Respublikası Joqarı bilimlendiriw, ilim hám innovaciyalar ministrligi janındaǵı Ilim-pán jámiyetshilik Keńesi aǵzaları tárepinen dúzilgen jumısshı topar D.Eshmuratov,  O.Eshimbetov, I.Seytnazarovalar Berdaq atındaǵı Qaraqalpaq mámleketlik universitetinde boldı.

Dáslep jumısshı topar aǵzalar universittetiń Jaslar máseleleri hám ruwxıy-aǵartıwshılıq isleri boyınsha prorektor S.Alawatdinov benen birgelikte  universitettiń Málimleme resurs orayı, oqıw hám ilimiy laboratoriyalar, asxana, sport zalları, studenler turaq jayları hám ondaǵı dógereklerdiń jańa oqıw jılına tayarlıq processlerin kózden ótkerip, ózleriniń unamlı pikirlerin bildirdi.

Bul sport zalları studentlerdiń densawlıǵın hám fizikalıq tayarlıǵın bekkemlew ushın zamanagóy sport inventarlar menen támiyinlengen bolıp, onda tek ǵana turaqlı shınıǵıwlar ótkeriw emes, al túrli sport jarısları hám komandalıq oyınlardı shólkemlestiriw ushın da sharayatlar jaratılǵan.

Al kitapxanalarda bolsa studentler ushın ádebiy kitaplar, ilimiy jurnallar hám elektron resurslarǵa kiriw imkaniyatı jolǵa qoyılǵan. Sonday-aq, studentler turaq jaylarında ulıwma paydalanıw ushın asxanalar, dem alıw xanaları hám oqıw xanaları, studentler óz-ara pikirlesiw ushın keń múmkinshilikler bar. Bul óz gezeginde studenttiń rawajlanıwı, qolaylı sharayatlarda bilim alıwı hám óz ústinde islewi ushın áhmiyetli bolıp esaplanadı.

QMU baspasóz xızmeti