Bunnan 6 jıl aldın tayarlıqta júrgen waqıtlarım ele esimde, hár universitettiń aldınan ótkende «Maǵan da usınday ullı dárgayda oqıw nesip eterme eken? Ákem de, anam da usı jerde bakalavr hám magistratura basqıshlarında oqıǵan. Maǵan da solardıń jolın bererme eken?» dep kewlimnen ótkeretuǵın edim.

Sol jılı yaǵnıy, 2018-jılı Berdaq atındaǵı Qaraqalpaq mámleketlik universiteti Sanaat texnologiyası fakultetine studentlikke qabıl etilip, ápiwayı student emes, 3 jıl dawamında universitettiń «Jıl studenti» bolıw baxtına miyassar boldım. Elimizde bilimlendiriw tarawındaǵı alıp barılıp atırǵan reformalar, jaslarǵa berilip atırǵan imkaniyatlardan paydalanǵan halda men de universittetke ekinshi qánigelikke hújjet tapsırdım hám jáne bir márte studentlik baxtı nesip etti.

Keshe ǵana jańa oqıw jılınıń baslanıwı, onıń ashılıw máresimin kórip 4 jıl universitette bilim alǵan waqıtlarım yadıma túsip ketti. Belsendi jaslar menen jámiyetlik jumıslarda, tańlaw-festivallardaǵı qatnasqan waqıtlarımız, qanshadan qansha quwanıshlarımızdıń gúwası boldı bul orın. Universitet-bizden aldın da, bizden keyin de neshe mıń jaslardıń ómirinde óziniń óshpes izleri menen máńgi yadımızda qaladı.

Pursattan paydalanıp, usınday ullı dárgayǵa studentlikke qabıl etilgen bárshe studentlerdi shın júregimnen qutlıqlayman. Olardıń oqıwlarında tabıs, tańlaǵan kásipleriniń jetik qánigesi bolıp jetilisiwine tileklespen.

 Gozzal Jalgasova

Psixologiya tálim baǵdarı sırtqı bólim studenti