Búgin 11-sentyabr kúni Berdaq atındaǵı Qaraqalpaq mámleketlik universitetinde 2024/2025 oqıw jılında universitet Ilimiy keńesiniń dáslepki májilisi bolıp ótti. Onda universitettiń barlıq prorektorları, bólim baslıqları, fakultet dekanları, kafedra baslıqları hám ilimiy keńes aǵzaları qatnastı.

Májilisti universitet rektorı Axmed Reymov basqarıp bardı. Ol óz shıǵıp sóylegen sózinde jańa oqıw jılında universitettiń ilimiy hám bilimlendiriw potencialın arttırıw ushın hámme birgelikte islew zárúr ekenligin atap ótti. Bunnan soń, Ilimiy keńestiń kún tártibindegi máseleler menen tanıstırıp ótti.

Kún tártibindegi máseleler boyınsha tiykarınan universitettiń Oqıw isleri boyınsha prorektor O.Duysenbaevtıń 2024/2025 oqıw jılına tayarlıq procesleri, oqıw platformalarınıń taza oqıw jılına tayarlıq halatları hám aldaǵı rejeleri, sonday-aq universitettiń Jaslar máseleleri hám ruwxıy-aǵartıwshılıq isleri boyınsha prorektorı S.Alawatdinovtıń ruwxıylıq hám aǵartıwshılıq, jaslar menen islesiw jumısların jedellestiriw máseleleri haqqında bayanatları tıńlananıp, Ilimiy keńes aǵzaları tárepinen maqullandı.

Haqıyqatında da universitettiń jańa oqıw jılına tayarlıq processleri hám jaslar menen islesiwdi jedellestiriw máseleleri keńestiń kún tártibiniń áhmiyetli bólegi bolıp, bul processlerdiń barlıǵı studentlerdiń oqıw hám tárbiya procesin jaqsılawǵa qaratılǵan. Ilimiy keńeste qabıl etilgen qararlar jańa oqıw jılı tabıslı ótiwi hám studentlerge zamanagóy bilim beriwde úlken áhmiyetke iye.

QMU baspasóz xızmeti