Búgin Berdaq atındaǵı Qaraqalpaq mámleketlik universitetiniń májilisler zalında 2024/2025-oqıw jılı ushın universitet kafedraları aldında turǵan wazıypalar hám aldaǵı waqıtta ámelge asırılıwı tiyis bolǵan rejelerge baǵıshlanǵan májilis bolıp ótti. Májiliste universitettiń ilimiy isler hám innovaciyalar boyınsha prorektorı I.Turdımambetov, oqıw isleri boyınsha prorektor O.Duysenbaev, xalıqaralıq birge islesiw boyınsha prorektor T.Nurımbetov, tiyisli qánigelik kafedraları baslıqları qatnastı.
Májilisti ilimiy isler hám innovaciyalar boyınsha prorektor I.Turdımambetov ashtı hám basqarıp bardı. Májiliste universitette ótken oqıw jılında ámelge asırılǵan jumıslar nátiyjeliligi hám tiyisli kafedralar tárepinen aldaǵı waqıtta alıp barılıwı tiyis bolǵan wazıypalar dodalandı. Olardıń arasında bilimlendiriwdiń sapasın arttırıw, oqıw baǵdarlamaların zamanagóy talaplar tiykarında jańalaw hám studentlerdiń ámeliy bilimlerin bekkemlew baǵdarındaǵı jumıslar áhmiyetli orın iyeledi. Sonday-aq, ilim hám bilimlendiriw integraciyasın kúsheytiw, studentlerdi ilimiy jumısqa keńnen tartıw hám ilimiy izleniwlerdiń nátiyjeliligin arttırıw máseleleri de kóterildi.
Kafedralardıń zamanagóy ilim jetiskenliklerin ámeliyatqa engiziw, xalıqaralıq ilimiy birge islesiwdi rawajlandırıw hám óz tarawlarında innovaciyalıq izertlewlerdi ámelge asırıw ústinde islewi zárúr ekenligi atap ótildi. Bul arqalı tek ǵana studentlerge joqarı sapalı bilim beriw emes, al milliy hám xalıqaralıq kólemde universitettiń abırayın arttırıw hám ilimiy jámáát arasındaǵı birge islesiwdi kúsheytiw maqset etilmekte.
Májilis dawamında kafedralar aldındaǵı áhmiyetli wazıypalar hám keleshekte ámelge asırılıwı kerek bolǵan rejeler kórip shıǵıldı. Universitet administraciyası hám kafedra basshıları aldına qoyılǵan maqsetler tek ǵana bilimlendiriw processlerin jaqsılawǵa emes, al universitettiń ilimiy potencialın arttırıwǵa qaratılǵan. Bul rejelerdiń tabıslı ámelge asırılıwı universitettiń keleshektegi rawajlanıwında áhmiyetli qádem bolıp xızmet etedi.
QMU baspasóz xızmeti
