Usı jıldıń 28-sentyabr kuni Qaraqalpaq mámleketlik universiteti studentleri hám magistrantları qatnasıwında Ózbekstan Respublikası Joqarı bilimlendiriw, ilim hám innovaciyalar ministrliginiń 2024-jıl 17-sentyabr kúngi “TechnoWays” texnologiyalıq rawajlanıw marafonın shólkemlestiriw haqqında”ǵı 339-sanlı buyrıǵı tiykarında student jaslardıń innovaciyalıq dóretiwshilik qábiletin júzege shıǵarıw, intellektuallıq dárejesin rawajlandırıw, olardı qollap-quwatlaw, izleniwshilik sheberliklerin asırıw maqsetinde “TechnoWays” texnologiyalıq rawajlanıw marafonı tańlawı ótkerildi.
Tańlawdı Qaraqalpaq mámleketlik universiteti Ilimiy isler hám innovaciyalar boyınsha prorektorı Izimbet Turdimambetov kiris sóz benen ashıp berdi, tańlawdıń áhmiyeti hám ótkeriliw tártipleri haqqında toqtalıp ótken halda tańlaw qatnasıwshılarına tabıslar tiledi. Bul tańlawǵa student jaslardan 20 dan aslam innovaciyalıq joybarlar kelip túsken bolsa, sonıń ishinde 19 talaban tańlawdıń juwmaqlawshı basqıshında óz joybarları menen qatnastı. Tańlaw eki baǵdarda ótkerildi. “Texnologiyalıq sheshim” hám “Programmalıq támiyinlew” nominaciyaları boyınsha talabanlar joybarları bahalandı.
Tańlaw juwmaǵına kóre, “Texnologiyalıq sheshim” nominaciyası boyınsha Matematika fakulteti 4-basqısh studenti Duysenbayev Aydos “Gidroponika” joybarı menen 1-orındı, Sanaat texnologiyası fakulteti 3-basqısh studenti Bayanov Samat “Innovaciyalıq zakrivalka” joybarı menen 2-orındı jeńip alǵan bolsa, Fizika fakulteti 3-basqısh studenti Turdıbaev Dawran “Ósimlik hám terek japıraqların mineral tóginlerge hám janılǵı briketlerine aylandırıw” joybarı menen hám de Matematika fakulteti 2-basqısh studenti Satniyazova Indira “Mikro jasıl ósimlikler” joybarı menen 3-orınǵa múnásip kórildi.
“Programmalıq támiyinlew” nominaciyası boyınsha Qaraqalpaq filologiyası hám jurnalistikası fakulteti 4-basqısh studenti Qallibekova Dinora “Xalıq xızmetindegi onlayn dárixana” joybarı menen 1-orındı, Matematika fakulteti 4-basqısh studenti Qogambaev Alibek “Virtual ximiya” joybarı menen 2-orındı jeńip aldı. Óz islenbeleri menen tańlawǵa belsendi qatnasqan jáne eki student: Matematika fakulteti 3-basqısh studenti Utemuratova Miyuagúl “Kóp tarmaqlı tazalaw xızmetin avtomatlastırıw” joybarı menen hámde Matematika fakulteti 2-basqısh studenti Ajiniyazova Ayjamal “Qaraqalpaqstanda miynet bazarın sanlastırıw” joybarı menen sıylı 3-orın iyelerine aylandı.
Tańlaw shártlerine kóre, hár eki nominaciya boyınsha jeńimpazlar universitettiń “Innovaciyalıq fondı” ǵárejetleri esabınan aqshalay sıylıqlanadı. Sonday-aq, tańlaw jeńimpazlarınıń joybarları Ózbekstan Respublikası Joqarı bilimlendiriw, ilim hám innovaciyalar ministrligi janındaǵı Innovaciyalıq rawajlanıw agentligi tárepinen ótkeriletuǵın respublikalıq tańlawlarǵa jollanba aladı.
QMU baspasóz xızmeti
