Búgin 3-oktyabr kúni Berdaq atındaǵı Qaraqalpaq mámleketlik universitetinde Tashkent mámleketlik texnika universiteti menen birgelikte Ministrler Kabinetiniń tiyisli biyligine muwapıq, “Elektr támiynatı sistemasınıń áhmiyetli mashqalaları” atamasında IV Xalıqaralıq ilimiy-texnikalıq konferenciya bolıp ótti. Dáslep Berdaq atındaǵı Qaraqalpaq mámleketlik universiteti rektorı A.Reymov barlıq konferenciya qatnasıwshıların qutlıqlap, konferenciya jumıslarına tabıslar tiledi.
Ózbekstan Respublikası Joqarı bilimlendiriw, ilim hám innovaciyalar ministrligi, Qaraqalpaq mámleketlik universiteti hám Tashkent mámleketlik texnika universiteti menen birgelikte shólkemlestirilgen ilajda Germaniya, Rossiya, Túrkiya, Qubla Koreya, Yaponiya, Slovakiya, Malayziya, BAÁ hám bir qatar ǴMDA mámleketlerinen abıraylı joqarı bilimlendiriw mákemeleri qatnastı hám ilim oraylarınıń professorları, xızmetkerleri, energetika kompaniyalarınıń wákilleri jáne jergilikli ilimpazlar, jas ilimpazlar, doktorantlar, aspirantlar, magistrantlar hám bakalavriat dárejesinde bilim alıp atırǵan hám ilimiy izleniwde bolǵan studentler qatnastı.
Konferenciyadan gózlengen tiykarǵı maqset – elektr támiynatı sistemasınıń áhmiyetli mashqalaları, atap aytqanda, onıń isenimliligi hám energiya nátiyjeliligin arttırıw, optimal joybarlaw, elektr energiyası sapasın támiyinlew baǵdarında jergilikli hám xalıqaralıq ilimiy mektepler tárepinen alıp barılıp atırǵan ilim-izertlewler boyınsha pikir alısıw, sonday-aq, elektr támiynatı sistemasın transformaciyalaw, intellektuallastırıw hám sanlastırıw sıyaqlı innovaciyalıq qollanbalardı engiziw imkaniyatların analizlewden ibarat.
Aytıw múmkin, elektr támiynatı mashqalası búgingi kúnde hár qashanǵıdan da aktual hám áhmiyetli bolıp esaplanadı. Ekonomika tarmaqlarınıń rawajlanıwı, xalıqtıń turmıs abadanlıǵınıń artıwı taraw qánigeleriniń aldına elektr támiynatı sistemasınıń úzliksizligin hám tutınıwshılardı sapalı elektr energiyası menen támiyinlew baǵdarında bir qatar áhmiyetli wazıypalardı qoymaqta. Búgingi kúnde respublikamızda tutınıwshılar elektr támiynatı sistemasın jaqsılaw menen baylanıslı bir qatar ámeliy jumıslar ámelge asırılmaqta.
Sońǵı jılları respublikamızdıń sanaat tarmaqlarına “jasıl ekonomika” sistemasın engiziw, sociallıq tarawda energiya nátiyjeliligin arttırıw hám qayta tikleniwshi energiya dereklerinen paydalanıwdı keńeytiw, innovaciyalıq rawajlanıwdı jedellestiriw, tábiyǵıy resurslardan aqılǵa uǵras paydalanıw boyınsha keń kólemli jumıslar ámelge asırıldı. Búgin ótkerilip atırǵan konferenciyada usı baǵdarda alıp barılıp atırǵan ilim-izertlew jumısları joqarı bilimlendiriw hám óndiris tarawı qánigeleriniń qatnasıwında keńnen dodalanıp, bul ilim-izertlew nátiyjelerin ámeliyatqa engiziw imkaniyatları úyreniledi.
Konferenciyada energetikanıń házirgi jaǵdayı hám perspektivaları, energiya nátiyjeliligi, energetikada sanlı texnologiyalardıń qollanılıwı, energiya hám resurs únemlew, jıllılıq energetikası, elektr energetikası hám suw-energetika mashqalaları; atom energetikası; alternativ hám qayta tikleniwshi energiya derekleri hám energetikanıń ekologiyalıq mashqalaları baǵdarlarında alıp barılıp atırǵan ilim-izertlew jumısları dodalanadı.
Konferenciya óz jumısın tómendegi baǵdarlarda alıp baradı:
- Elektr támiynatı sistemasınıń ulıwmalıq mashqalaları: isenimliligi hám energiya nátiyjeliligin arttırıw.
- Elektr támiynatı sistemasın optimal joybarlaw hám ekspluataciya qılıw, elektr energiyası sapasın támiyinlew máseleleri.
- Ekonomika tarmaqların transformaciyalaw, intellektuallastırıw hám sanlastırıw.
- Elektr támiynatı sistemasında dástúriy emes hám qayta tiklenetuǵın energiya derekleri.
- Injener kadrlar tayarlaw máseleleri.
- Ekologiya hám energetika.
