Búgingi kúnde texnologiyalıq rawajlanıw barlıq tarawlarda joqarı orın iyelep, jámiyettiń rawajlanıwın belgilep bermekte. Usı múnásibet penen, jaslar arasında innovaciyalıq pikirlewdi rawajlandırıw hám texnologiyalıq jańalıqlardı qollap-quwatlaw maqsetinde ótkerilip atırǵan «TechnoWays» texnologiyalıq rawajlanıw marafonı respublikalıq basqıshı búgin óz juwmaǵına jetti.
Usı ilajdıń jabılıw máresiminde Qaraqalpaqstan Respublikası Joqarǵı Keńesiniń komitet baslıǵı T.Romanov, Qaraqalpaqstan Respublikası Ministrler Keńesi baslıǵınıń orınbasarı B.Ótemuratov, Joqarı bilimlendiriw, ilim hám innovaciyalar ministriniń orınbasarı O.Maxkamov, Qaraqalpaqstan Respublikası Joqarı bilimlendiriw, ilim hám innovaciyalar ministri B.Qayıpbergenovlar qatnastı.
«TechnoWays» texnologiyalıq rawajlanıw marafonınıń respublikalıq basqıshınıń jabılıw máresimi sheńberinde miymanlar dáslep marafon qatnasıwshıları tárepinen tayarlanǵan innovaciyalıq kórgizbeler menen tanıstı. Miymanlar innovaciyalıq islenbeler menen tanısıp, joybarlardıń ámeliy bahası hám áhmiyetliligine joqarı baha berdi. Kórgizbe dawamında jas qatnasıwshılar miymanlarǵa óz islenbeleriniń texnologiyalıq imkaniyatları, olardıń qollanılıwı hám sociallıq áhmiyeti haqqında tolıq maǵlıwmat berdi.
Bunnan soń, ilajdıń sıylıqlaw máresimi bolıp ótti. Onda shıǵıp sóylegenler «TechnoWays» marafonınıń mámleketimizde texnologiyalıq rawajlanıwdı jedellestiriwde tutqan áhmiyetli ornın atap ótip, bul ilaj jas áwladtı joqarı shıńlarǵa iytermeleytuǵın platforma ekenin ayrıqsha atap ótti. Bunnan soń, marafon jeńimpazlarına arnawlı diplom hám estelik sawǵaların tapsırdı.
Usı ilajdıń jabılıw máresimi ózgeshe kóterińkilik penen shólkemlestirilip, jıynalǵanlarǵa studentler tárepinen tayarlanǵan koncert baǵdarlaması usınıldı. Bul baǵdarlamada studentlerdiń dóretiwshilik shıǵıwları, muzıka hám ayaq oyınları miymanlar názerine usınıldı.Konsert baǵdarlaması dawamında jaslarǵa tán kúsh hám dóretiwshilik sheberlik kórsetilip, ilajǵa ózgeshe zawıq baǵıshladı.
Qaraqalpaqstan Joqarı oqıw orınları arasında ótkerilgen «TechnoWays» texnologiyalıq rawajlanıw máresiminde sıylıqlanǵanlar dizimi.
«Programmalıq támiynat» baǵdarı boyınsha
- Turemuratova Biybinaz
- Orazimbetova Akbarali
- Qallibekova Dinora
«Texnologiyalıq sheshim» baǵdarı boyınsha
- Baymanov Samat
- Usnatdinov Jalalatdin
- Muxammeddinova Umida
Aymaqlardan kelgen hám onlayn dizimnen ótken qatnasıwshılar arasında ótkerilgen «TechnoWays» texnologiyalıq rawajlanıw máresiminde sıylıqlanǵanlardıń dizimi.
«Programmalıq támiynat» baǵdarı boyınsha
1.Temirov Lazizbek
2.Umirov Uchqun
3. Qagambaev Alibek
«Texnologiyalıq sheshim» baǵdarı boyınsha
1.Muhammadjanov Qudratbek
2.Ibrohimov Numonjon
3.Yodgorov Lazizbek
