Ózbekstan Respublikası Ilimler akademiyası Qaraqalpaqstan bólimi Qaraqalpaq Gumanitar ilim izertlew institutında belgili folklortanıwshı hám ádebiyattanıwshı alım, professor Sarıgúl Bahadırovanıń 80 jıllıǵına baǵıshlanǵan «Túrkiy xalıqlar folklorı hám ádebiyatın úyreniwdiń aktual máseleleri: Koncepciyalar, Teoriya hám Problemalar» atamasındaǵı xalıqaralıq ilimiy-teoriyalıq konferenciya bolıp ótti. Oǵan elimizge belgili ádebiyatshı ilimpazlardan tısqarı, Túrkiya, Qazaqstan Respublikalarınan alımlar, doktorantlar, ilimiy izleniwshiler hám respublikamızdıń ǵalaba xabar quralları wákilleri qatnastı.
Konferenciyanı Berdaq atındaǵı Qaraqalpaq mámleketlik universiteti rektorı, Ózbekstan Respublikası Ilimler akademiyası Qaraqalpaqstan bólimi Prezidiumı baslıǵı, akademik Axmed Reymov ashtı hám basqarıp bardı. Onda Qaraqalpaqstan Respublikası Joqarǵı Keńesiniń komitet baslıǵı Tajibay Romanov shıǵıp sóylep, yubilyardı respublikamız húkimeti atınan qızǵın qutlıqlap, professor Sarıgúl Bahadırovaǵa «Ibratlı hayal» kókirek belgisin hám estelik sawǵaların saltanatlı túrde tapsırdı.
Bunnan soń Tashkent mámleketlik Shıǵıstanıw institutı direktorı Vohidjan Twqliev, Qaraqalpaqstan Jazıwshılar awqamınıń baslıǵı Keńesbay Karimov, Ózbekstan Respublikası Ilimler akademiyası Qaraqalpaqstan bólimi Qaraqalpaq Gumanitar ilim izertlew institutı direktorı Maqset Qarlıbaev, senator Batır Matmuratovlar sózge shıǵıp, ilimpazdıń ilim hám ádebiyat tarawındaǵı tutqan ornın, qolǵa kirgizgen tabısların maqtanısh penen tilge aldı hám ózleriniń estelik sawǵaların tapsırdı.
Konferenciyada filiologiya ilimleriniń doktorı Zıyada Bekbergenova «Professor S.Bahadırovanıń ilimdegi hám dóretiwshiliktegi pidayı xızmetleri», Berdaq atındaǵı QMU professorı, filiologiya ilimleriniń doktorı Quwanıshbay Orazımbetov «Dúnya qarası keń, zeyni ótkir ilimpaz», Ózbekstan Respublikası Ilimler akademiyası janındaǵı Áliysher Nawayı atındaǵı Mámleketlik muzey direktorı, filiologiya ilimleriniń doktorı Jabbar Eshonqul, «Fidoyi va zahmatkash folklorshunos olima», Túrkiyadaǵı Pamukkale universitetiniń professorı, Jeyhun Vedat Uyǵur «Karakalpak ve túrk atasózlerinde ortaklasmalar», Ózbekstan jurnalistika hám ǵalaba kommunikaciyalar universiteti professorı, Fayzulla Muminov «Pesn proroka», Sherxan Murtaza atındaǵı xalıqaralıq Taraz innovaciyalıq institutınan filologiya ilimleriniń kandidatı, docent Aziza Karibaeva «Túrki-Monǵol tilderinen engen terminler qabatı», Berdaq atındaǵı QMU professorı, tariyx ilimleriniń doktorı Baxıtbay Qoshanov «Voprosı mentaliteta karakalpakov v trudax professora Sarıgul Baxadırovoy» atamasındaǵı bayanatları menen shıǵıp sóyledi.
Sonday-aq, ánjumanda belgili shayırlardan «Dwstlik» ordeniniń iyesi, «Qaraqalpaqstan Respublikasına miyneti sińgen mádeniyat xızmetkeri» Gúlistan Dáwletova, Gúlnara Nurlepesova hám Hákimniyaz Tóreniyazovlar yubilyarǵa arnalǵan qosıqların oqıp berdi. Konferenciyada Qaraqalpaqstan Respublikasına miyneti sińgen ilim ǵayratkeri, Beruniy atındaǵı mámleketlik sıylıqtıń laureatı, filologiya ilimleriniń doktorı, professor Sarıgúl Bahadırova ózine kórsetilip atırǵan bunday joqarı húrmet hám izzet ushın elimiz basshılarına, kásiplesleri hám shákirtlerine óziniń tereń minnetdarshılıq bildirip, olarǵa óziniń eń jaqsı tileklerin tiledi.
-Meniń baslı maqsetim, xalqımızdıń bay tili, ádebiyatı, mádeniyatı hám kórkem óneri menen dúnya civilizaciyasına salmaqlı úles qosqan xalıq ekenin kórsetiw hám onı ilimiy tiykarda dáliyllew boldı hám men bul maqsetime tolıq jettim,-dep oylayman dedi professor Sarıgúl Bahadırova óziniń sózinde. Sońınan konferenciya óz jumısın sekciyalarǵa bólingen halda dawam etti.
Sońınan konferenciya óz jumısın sekciyalarǵa bólingen halda dawam etti.
Adilbay Orazov,
Qaraqalpaqstan xabar agentligi sholıwshısı
