Ózbekstan Respublikası Prezidentiniń 2024-jıl 16-iyuldegi «Ataqlı qaraqalpaq shayırı hám oyshılı Ájiniyaz Qosıbay ulınıń tuwılǵanınıń 200 jıllıǵın keń belgilew haqqında»ǵı PQ-258-sanlı Qararında belgilengen wazıypalardı orınlaw maqsetinde usı jıldıń 14-oktyabr kúni Alisher Nawayı atındaǵı Tashkent mámleketlik ózbek tili hám ádebiyatı universitetinde «Ajiniyoz Qo‘siboy o‘g‘li adabiy merosini o‘rganishning dolzarb masalalari» atamasında xalıqaralıq ilimiy-ámeliy konferenciyası bolıp ótti. Onda Berdaq atındaǵı Qaraqalpaq mámleketlik universitetiniń professor-oqıtıwshıları hám student-jasları qatnastı.
Konferenciyanı Ózbekstan Jazıwshılar awqamınıń baslıǵı, Ózbekstan xalıq shayırı, senator Sirojiddin Sayyid qutlıqlaw sózi menen ashtı hám alıp bardı. Bunnan soń, Alisher Nawayı atındaǵı Tashkent mámleketlik ózbek tili hám ádebiyatı universitetiniń ilimiy hám innovaciyalıq isler boyınsha prorektorı Odina Jamoliddinova universitet rektorı Shuhrat Sirojiddinovtıń qutlıqlaw sózin oqıp esittirdi.
Ilimiy-ámeliy konferenciyanıń plenar májilisinde Alisher Nawayı atındaǵı Tashkent mámleketlik ózbek tili hám ádebiyatı universitetiniń «Ózbek ádebiyatı tariyxı hám tekstologiya» kafedrasınıń baslıǵı, f.i.d. Nurboy Jabborov, Berdaq atındaǵı Qaraqalpaq mámleketlik universiteti «Qaraqalpaq ádebiyatı» kafedrasınıń professorı, f.i.d. Quwanıshbay Orazımbetov, Farabiy atındaǵı Qazaq Milliy universiteti Turan-Iran ilimiy izertlew orayı direktorı, f.i.d., professor Islam Jemeney (onlayn), Túrkiya Respublikası Yildirim Bayazid universiteti professorı, f.i.d. Funda Toprak (onlayn), Ázerbayjan Respublikası Muhammed Fizuli atındaǵı Qoljazbalar Institutı úlken ilimiy xızmetkeri, filologiya ilimleri filosofiya doktorı Shahla Májidova (onlayn), Tashkent mámleketlik Shıǵıstanıw universiteti professorı, f.i.d. Boqijon To‘xliyev, Alisher Nawayı atındaǵı Tashkent mámleketlik ózbek tili hám ádebiyatı universitetiniń «Ádebiyat teoriyası hám házirgi ádebiy process» kafedrasınıń baslıǵı, f.i.d., professor Bahadır Karimov, Ózbekstan Respublikasında xızmet kórsetken mádeniyat xızmetkeri, Qaraqalpaqstan xalıq shayırı, awdarmashı Rustam Musurman, Berdaq atındaǵı Qaraqalpaq mámleketlik universiteti «Qaraqalpaq ádebiyatı» kafedrasınıń professorı, Ózbekstan Respublikasında xızmet kórsetken mádeniyat xızmetkeri, shayır Baxtıyar Genjemuratov, Berdaq atındaǵı Qaraqalpaq mámleketlik universiteti Qaraqalpaq filologiyası hám jurnalistika fakultetiniń dekanı, f.i.d. Qonaqbay Turdıbaev, usı univesitettiń «Qaraqalpaq til bilimi» kafedrasınıń professorı, f.i.d. Gúlmira Qarlıbaeva, «Qaraqalpaq ádebiyatı» kafedrasınıń docenti, f.i.k. Jámiyla Saǵıydullaevalar óz bayanatları menen qatnastı.
Sonıń menen birge, Berdaq atındaǵı Qaraqalpaq mámleketlik universitetiniń Kórkem óner fakultetiniń hám Ózbekstan mámleketlik kórkem óner hám mádeniyat institutı Nókis filialınıń professor-oqıtıwshıları hám student-jasları tárepinen tayarlanǵan Kórkem bólimde Ájiniyazdıń «Ellerim bardı» qosıǵınan Ájiniyazdıń monologi hám Ájiniyaz (Ziywar) shayır sózine jazılǵan nama qosıqları atqarılıp, tıńlawshılarda ayrıqsha tásir qaldırdı.
Sonday-aq, bul ilimiy-ámeliy konferenciyaǵa Berdaq atındaǵı Qaraqalpaq mámleketlik universitetiniń «Qaraqalpaq ádebiyatı» kafedrasınıń docentleri Pátiyma Allambergenova, Marjangúl Orazımbetova, Abadan Dosımbetova, Jupargúl Qaniyazova, Ájiniyaz atındaǵı Nókis pedagogikalıq institutınıń «Qaraqalpaq ádebiyatı» kafedrasınıń baslıǵı, f.i.d. Sársenbay Qazaqbaev, kafedra docentleri Ádilbay Seytbekov hám Qoshqarbay Mátimovlar óz bayanatları menen qatnasıp, sertifikatlar menen sıylıqlandı.
