Búgin 17-oktyabr kúni Berdaq atındaǵı Qaraqalpaq mámleketlik universitetinde XVIII ásir túrkmen klassik shayırı Maqtumqulı Pıraǵınıń 300 jıllıǵına arnalǵan «Tuwısqan xalıqlar doslıǵın bekkemlewde Maqtımqulı dóretiwshiliginiń ornı» atamasındaǵı ilimiy-ámeliy konferenciya bolıp ótti. Konferenciyaǵa universitetimizdiń professor-oqıtıwshıları, student-jaslar hám Qaraqalpaqstan Respublikası Milliy mádeniy oraylarınan birqansha miymanlar qatnastı. Dáslep konferenciya qatnasıwshıları Maqtumqulı dóretiwshilik shıǵarmalarınan tayarlanǵan kórgizbeni tamashaladı. Bunnan soń, konferenciyanıń tiykarǵı bólimi baslandı. Ilimiy-ámeliy konferenciyanı universitetimizdiń rektorı, akademik Axmed Reymov ashıp berdi hám alıp bardı. Ol óz shıǵıp sóylewinde Maqtumqulınıń ulıwma adamzat máselelerine arnalǵan shıǵarmaları bugingi jaslarımız ushın da tárbiya mektebi bolatuǵınlıǵın aytıp ótti.

Konferenciya úsh basqıshta dawam etti. Onıń birinshi basqıshı milletler ara tatıwlıq, dos-tuwısqanlıq, milliy úrp-ádet hám de túrli milletlerdiń milliy mádeniyatın sáwlelendiretuǵın kórgizbeler, ekinshi basqıshında Maqtumqulınıń ómiri, dóretiwshiligi, shayır shıǵarmalarınıń mánis-mazmunı, ideya-tematikası, tuwısqan xalıqlar ádebiyatında shayır dóretiwshiliginiń úyreniliwi hám kórkem awdarmaları, Maqtumqulınıń dóretiwshiliginiń tuwısqan xalıqlar ádebiyatlarınıń bir-birine jaqınlasıwında kópir xızmetin atqaratuǵını haqqında Ózbekstan jazıwshılar Awqamı aǵzaları A.Ótepbergenov, qaraqalpaq ádebiyatı kafedrası docenti, shayır B.Genjemuratov, Túrkmen tili hám ádebiyatı kafedrası baslıǵı professor O.Gaylieva, ózbek tili hám ádebiyatı kafedrası docenti M.Ataniyazova, qaraqalpaq ádebiyatı kafedrası docenti P.Allambergenova, Qazaq tili hám ádebiyatı assistenti R.Kenjebayevalar óz bayanatları menen qatnastı.

Haqıyqatında da túrkiy xalıqlar ádebiyatında Maqtumqulı júdá úlken abıray-húrmetke iye shayır bolıp, Ózbekstanda da shayırdıń dóretiwshiligine úlken itibar menen qaraladı hám shıǵarmaları qızıǵıwshılıq penen oqıladı.  

QMU baspasóz xızmeti