Búgin paytaxtımızdaǵı «Jaslar orayı»nda Berdaq atındaǵı Qaraqalpaq mámleketlik universitetiniń Yuridika fakulteti studentleriniń qatnasıwında sudyalar menen ushırasıw bolıp ótti. Ushırasıwda Ózbekstan Respublikası Oliy sudı baslıǵınıń birinshi orınbasarı, jınayat isleri boyınsha sudlaw kollegiyasınıń baslıǵı Muslimov Ikrom Tuxtamurodovich, Oliy sud kadrlar basqarması baslıǵı Muzaffar Muxitdinov, Qaraqalpaqstan Respublikası sudınıń baslıǵı Tarixov Kamal Maqsetovichlar miymanda boldı. Ushırasıwdı universitet rektorı, akademik Axmed Reymov alıp bardı. Ol óz shıǵıp sóylewinde búgingi kúnde «Qaraqalpaqstan Respublikası sudı hám Berdaq atındaǵı Qaraqalpaq mámleketlik universiteti ortasındaǵı yuridikalıq kadrlardı tayarlaw tarawındaǵı birge islesiw haqqında»ǵı 2 tárepleme memorandumı dúzilip, bul boyınsha nátiyjeli jumıslar ámelge asırılıp atırǵanlıǵın aytıp ótti
Bunnan soń, Oliy sud kadrlar basqarması baslıǵı MMmuxitdinov, sózge shıǵıp, sudyalar jumıs iskerligi, tarawdaǵı ózgerisler hám huqıqıy reformalar haqqında tolıq maǵlıwmat berdi. Sonday-aq, jumıs procesindegi kúndelikli wazıypalar, nızamshılıqtaǵı ámeliy jańalıqlar hám sud sistemasındaǵı zamanagóy tendenciyalar studentlerge túsindirildi.
Ilaj dawamında Ózbekstan Respublikası Oliy sudı baslıǵınıń birinshi orınbasarı, jınayat isleri boyınsha sudlaw kollegiyasınıń baslıǵı I.Muslimov sózge shıǵıp, sud sistemasındaǵı jumıs processleri, sudyalardıń minnetlemeleri hám juwapkershilikleri, sonday-aq, sudya kásibiniń qıyınshılıqları, etika normaları hám ádillik principlerin óz ishine alǵan áhmiyetli tárepleri haqqında student-jaslarǵa keń túrde maǵlıwmatlar berdi.
Ushırasıw dawamında studentler ózleriniń qızıqtırǵan sorawlarına taraw qánigelerinen juwaplar alıp, kóplegen paydalı bilimlerge iye boldı. Bunday ushırasıwlar studentlerge teoriyalıq bilimlerdi ámeliyatqa engiziw jolların úyretip ǵana qalmay, al keleshektegi kásiplik jumısına bolǵan isenimdi de bekkemleydi.
QMU baspasóz xızmeti
