Búgin 2-noyabr kúni Koreyanıń Ilim hám texnologiyalar universiteti professorı Cho Kun, Young In SN co limited kompaniyasınıń wákili Woo Ahra hám Koreyanıń “Basic Science Instituti” professorı Kang Hoonlar Berdaq atındaǵı Qaraqalpaq mámleketlik universitetinde boldı.

Dáslep miymandı universitet rektorı, akademik A.Reymov kútip alıp, tárepler menen birge islesiwdi elde rawajlandırıw boyınsha sáwbetlesiw alıp bardı. Ol óz sózinde Koreyanıń Ilim hám texnologiyalar universiteti professorı Cho Kun, Young In SN co limited kompaniyasınıń wákili Woo Ahra hám Koreyanıń “Basic Science Instituti” professorı Kang Hoonlar menen sońǵı úsh jıl dawamında óz-ara birge islesiw baylanısların nátiyjeli jolǵa qoyıp kiyatırǵanlıǵın sonday-aq, zamanagóy texnologiyalardı engiziw hám ilimiy-izertlew laboratoriyaların shólkemlestiriw boyınsha birge islenip atırǵan rejeleri haqqında aytıp, miymanlarǵa óz minnetdarshılıǵın bildirdi.

Ushırasıw dawamında Berdaq atındaǵı Qaraqalpaq mámleketlik universiteti rektorı, akademik Reymov Axmed Mambetkarimovich tárepinen Koreyanıń Ilim hám texnologiyalar universiteti professorı Cho Kun hám Young In SN co limited kompaniyasınıń wákili Woo Ahralarǵa «Qaraqalpaq mámleketlik universitetiniń húrmetli professorı» ataǵı berilgenligi haqqındaǵı diplomlardı saltanatlı túrde tapsırdı.

Ilaj juwmaǵında miymanlar «Qaraqalpaq mámleketlik universitetiniń húrmetli professorı» ataǵın berip atırǵanı hám bunday úlken isenim ushın universitet rektorına óz minnetdarshılıǵın bildirip, aldaǵı waqıtları zamanagóy texnologiyalar hám innovaciyalıq kózqaraslardı qollap-quwatlaw jáne ilimiy potencialdı bunnan bılay da arttırıw arqalı ilim tarawındaǵı birge islesiwdi elede bekkemlew jolında jumıs alıp barıwǵa tayar ekenin bildirdi.

QMU baspasóz xızmeti