Usı jıldıń 9-noyabr kúni Qaraqalpaqstan Respublikası Nókis qalasında Joqarı bilimlendiriw, ilim hám innovaciyalar ministrliginiń keńeytilgen Kollegiallıq jıynalısı ótkeriliwi, sonday-aq, tarawda «Jasıl mákan» ulıwma milliy joybarı sheńberinde Ulıwma respublikalıq marafonǵa start beriliwi hám Nókis qalasında ajıratılǵan jer maydanında «Ziyalılar baǵı»n shólkemlestiriw maqsetinde terek nállerin otırǵızıw jobalastırılǵan.

Usı ilajlarǵa qatnasıw maqsetinde Qaraqalpaqstan Respublikasına kelgen respublikamızdaǵı joqarı oqıw orınlarınıń wákilleri hám student-jasları ushın Berdaq atındaǵı Qaraqalpaq mámleketlik universiteti tárepinen mádeniy, sport ilajları hám seminarlar shólkemlestirildi.

Psixologiyalıq seminar-treningte psixologlar tárepinen, studentler menen sananı basqarıw usılları, stressti jeńiw jolları hám ózine bolǵan isenimdi arttırıw temalarında sáwbetler ótkerdi. Trening dawamında studentler ózlerin qızıqtırǵan sorawlarǵa juwap aldı hám psixologiyalıq turaqlılıqtı arttırıwǵa qaratılǵan ámeliy shınıǵıwlardı orınladı.

Ilajdıń sport bólimi stol tennisi jarısları menen dawam etti. Bul sport ilajı student-jaslar arasında salamat báseki ortalıǵın jaratıp, fizikalıq shınıǵıwlarına úles qosıp, studentler arasında doslıq baylanıslardı bekkemlew imkaniyatın jarattı.

Sonday-aq, «Zakovat» intellektual oyınlar da ótkerilip, studentlerdiń oylaw, pikirlew qábiletlerin hám jámáátte islew kónlikpelerin rawajlandırıwǵa qaratıldı. Hár qıylı temalar boyınsha bilimlerdi sınaqtan ótkeriwshi oyın qatnasıwshılar ushın úlken qızıǵıwshılıq oyattı hám olardıń óz-ara bilim almasıwına sharayat jarattı.

Bunday ilajlardıń tiykarǵı maqseti studentlerdiń ruwxıy hám fizikalıq salamatlıǵın bekkemlew, olardıń intellektuallıq rawajlanıwına járdemlesiw bolıp tabıladı.

 Student A.Nurlibaev