Búgin 9-noyabr kúni Nókis qalasında Joqarı bilimlendiriw, ilim hám innovaciyalar ministrliginiń keńeytilgen Kollegiallıq jıynalısı bolıp ótti. Onda Joqarı bilimlendiriw, ilim hám innovaciyalar ministrliginiń juwaplı xızmetkerleri, aymaqlıq basqarmalarınıń basshıları, respublikalıq joqarı bilimlendiriw mákemeleriniń rektorları hám direktorları qatntı. Kollegiya jıynalıs Qaraqalpaqstan Respublikası Ministrler Keńesi menen birgelikte ótkerildi.
Kollegiya jıynalıs joqarı bilimlendiriw, ilim hám innovaciyalar ministri Qońıratbay Sharipov basshılıǵında bolıp ótti. Májilisti Qaraqalpaqstan Respublikası Ministrler Keńesiniń Baslıǵı Farxod Ermanov ashıp berdi.
Májiliste aymaqlardı rawajlandırıw hám drayver noqatların belgilew, tarmaq hám tarawlarda bar bolǵan mashqalalarǵa sheshim tabıw, máhálleler, kerek bolsa, hár bir shańaraqtıń turmıs tárizine unamlı tásir kórsete alatuǵın ilimiy tiykarlanǵan qatnastı engiziwde áyne joqarı oqıw orınları hám texnikumlar jámáátiniń ilimiy potencialın hám ámeliy tájiriybesin keńnen engiziw máselelerine ayrıqsha itibar qaratıldı. Sonıń menen birge, májiliste Berdaq atındaǵı Qaraqalpaq mámleketlik universiteti rektorı A.Reymov shıǵıp sóylep mámleketimizdegi sociallıq-ekonomikalıq rawajlanıwdı jańa basqıshqa alıp shıǵıw, ekonomika hám tarawǵa baylanıslı reformalardı ámelge asırıw procesinde joqarı oqıw orınları hám texnikumlardıń qatnasıwı úlken áhmiyetke iye ekenligin aytıp ótti.
Mine usınday sistemalı qatnas hám ilimiy-ámeliy tájiriybeniń Qaraqalpaqstan Respublikasında da baslanıwı biykarǵa emes. Bul májilis Qaraqalpaqstan Respublikası hám barlıq aymaqlardaǵı joqarı oqıw orınları hám texnikumlardıń jumısın jańa basqıshqa alıp shıǵıw, sociallıq-ekonomikalıq rawajlanıwdı bilimlendiriw hám innovaciyalar arqalı kúsheytiw ushın áhmiyetli qádem bolatuǵını kútilmekte.
Keyingi jıllarda mámleketimizde ámelge asırılıp atırǵan keń kólemli reformalar negizinde ekonomikamızdı jańa basqıshqa alıp shıǵıw, mámleketimizde investiciyalıq ortalıqtı bunnan bılay da jaqsılaw, ekologiyanı saqlaw, tábiyiy resurslardan aqılǵa uǵras paydalanıw, awıl xojalıǵı hám azıq-awqat qáwipsizligin támiyinlew sıyaqlı tiykarǵı baǵdarlarda túpkilikli ózgerisler baqlanbaqta.
Usı jıldıń 7-noyabr kúni Prezident Shavkat Mirziyoyevtiń basshılıǵında ótkerilgen májiliste awıl xojalıǵında suw hám energiya resurslarınan aqılǵa uǵras paydalanıw, sonday-aq, joǵaltıwlardı azaytıw boyınsha bir qatar áhmiyetli ilajlar belgilendi.
Usı jılı, ásirese, joqarı bilimlendiriw, ilim hám innovaciyalar tarawına baylanıslı jańa wazıypalardı ámelge asırıwǵa ayrıqsha itibar qaratılıp, hár bir kanalǵa Irrigaciya universiteti, suw mashqalaları ilimiy institutı hám 9 texnikumdı dual bilimlendiriw tiykarında biriktiriw zárúrligi atap ótildi.
Bul háreketler astında, ol yamasa bul joybardıń hár bir basqıshı ilimiy tiykarda tallanadı hám processlerdi jáne de nátiyjeli basqarıw ushın usınıslar jáne juwmaqlar islep shıǵıladı.
Joqarı oqıw orınları hám texnikumlarımız óz aymaqların sociallıq-ekonomikalıq rawajlandırıwdaǵı belsendiligin arttırıwdı tiykarǵı wazıypa etip belgilep alıwı kerek. Onda 6 baǵdarǵa ayrıqsha itibar qaratıladı. Bular:
Birinshi baǵdar «Aymaqlardı rawajlandırıwdıń sociallıq-ekonomikalıq máselelerine baylanıslı kompleksli ilajlar.»
Ekinshi baǵdar «Innovaciyalıq aymaqlardı rawajlandırıwǵa baylanıslı ilajlar.»
Úshinshi baǵdar, «Xalıqtıń sociallıq jaǵdayın jaqsılawǵa baylanıslı ilajlar.»
Tórtinshi baǵdar, «Jasıl mákan ulıwma milliy joybarına baylanıslı ilajlar.»
Besinshi baǵdar, «Aldınǵı injener kadrlardı tayarlawǵa baylanıslı ilajlar.»
Altınshı baǵdar, «Bilimlendiriw, ilim hám óndiris integraciyası jáne texnologiyalıq parkler jumısına baylanıslı ilajlar.»
QMU baspasóz xızmeti
